یەکێک لە گەورەترین تۆڕەکانی بازرگانیی ماددە هۆشبەرەکان دەستگیرکران

ئاڤا نیوز 

هێزە ئەمنییەکانی عێراق لە بەغدا یەکێک لە "گەورەترین" تۆڕەکانی بازرگانی بە ماددە هۆشبەرەکانیان دەستگیرکرد، دەست بەسەر زیاتر لە 220 کیلۆگرام حەبی کەبتاگۆنی هۆشبەریشدا گیرا.

وێنە گەورەکە: دەستگیکردنی تۆمەتبارانی بەکارهێنان و کڕین و فرۆشتنی ماددە هۆشبەرەکان لە عێراق بووەتە کاری ڕۆژانەی هێزە ئەمنییەکان، بەشێوەیەک عێراق بووەتە گۆڕەپانی ساغکردنەوەی ئەو ماددانە.

ڕاگەیێنراوی فەرمی: بەگوێرەی ڕاگەیێنراوی سەنتەری میدیایی ئەنجوومەنی دادگەی باڵای عێراق، یەکێک لە گەورەترین تۆڕەکانی بازرگانیکردن بە ماددە هۆشبەرەکان لە بەغدا دەستگیرکراون کە ژمارەیان 10 کەس بووە، هەندێکیان بازرگانی بیانی بوون و 221 کیلۆگرام حەبی کەبتاگۆنی هۆشبەریان پێ بووە.

ئەوەی پێویستە بیزانیت: وەزارەتی ناوخۆی عێراق ئاشکرای کردووە، لە سەرەتای ئەمساڵەوە هەشت هەزار کەس لەسەر بەکارهێنان و بازرگانیکردن بە ماددە هۆشبەرەکان دەستگیرکراون و دەستیش بەسەر زیاتر لە دوو تۆن ماددەی هۆشەبەردا گیراوە.