لە هەولێر و سلێمانی ئامادەکاری بۆ ڕێگەگرتن لە کۆبوونەوەی ئاو دەکرێت

ئاڤا نیوز

كه‌شناسی هۆشدارى دەدات له‌ دوانیوه‌ڕۆی ئەمڕۆ چوارشه‌ممه‌وه‌ شه‌پۆلێكی بارانبارین شارەکانی هەرێمی کوردستان دەگرێتەوە و پێشبینی کۆبوونەوەی ئاو دەکرێت. 

وێنە گەورەکە: بەگوێرەی پێشبینی کەشناسی بارانێكی زۆر له‌ پارێزگاکانی هەرێمی کوردستان ده‌بارێت و پێشبینی کۆبوونەوەی ئاو دەکرێت، فەرمانگە خزمەتگوزارییەکانیش لە ئێستاوە خراونەتە ئامادەباشی بۆ  هەر بارێکی لەناکاو. 

لێدوانی فەرمی: ئومێد خۆشناو، پارێزگای هەولێر بە ئاڤا نیوز ڕاگەیاند: بۆ هەر ئەگەرێکی نەخوازراو و مەترسیی کۆبوونەوەی ئاو، سەرجەم فەرمانگە خزمەتگوزارییەکان و لایەنە پەیوەندیدارەکان، خراونەتە ئامادەباشییەوە بۆ بەهاناوەچوونی هاووڵاتیان.

لەلایەکی دیکەوە: زەردەشت ڕەفیق، گوتەبێژی شارەوانی سلێمانی بە ئاڤا نیوزی ڕاگەیاند: "سەرجەم مەنهۆڵەکان پاککراونەتەوە، چەند تیمی جیاواز پێکهێنراون بۆ ڕێگریکردن لە ڕوودانی حاڵەتی نەخوازراو و پێشکەشکردنی فریاگوزاریی بۆ دانیشتووانی سنووری پارێزگاکە."