سه‌رۆكوەزیران بارزانی داوای هەڵبژاردنێکی "دوور لە پێشێلکاری و ساختەکاری" دەکات

ئاڤا نیوز

سەرۆکوەزیران بارزانی جەخت لە گرنگیی بەشداریکردنی چاودێرانی نێودەوڵەتی بەتایبەتی یەکێتیی ئەوروپا لە هەڵبژاردن دەکاتەوە، بۆ ئەوەی پرۆسەکە بەشێوەیەکی دادپەروەرانە و دوور لە پێشێلکاری و ساختەکاری بەڕێوەبچێت.

 

چیرۆکی سەرەکی: ئەمڕۆ شەممە 24-08-2024، تۆرکیلد بیوگ، بەرپرسى نووسینگەى پەیوەندییەکانى یەکێتیی ئەوروپا لە هەرێمی کوردستان بەبۆنەی کۆتاییهاتنی ئەرکەکەی سەردانی سەرۆکوەزیران مەسرور بارزانی کرد و چەند بابەتێکیان تاوتوێ کرد.

ڕاگەیێنراوی فەرمی: بەپێی ڕاگەیێنراوێکی نووسینگەی سەرۆکوەزیران، لە دیدارەکەدا تۆرکیلد بیوگ جەختی لە بەردەوامبوونی کار و چالاکییەکانیان و درێژەدان بە هاوکاری و هەماهەنگیی لەگەڵ حکومەتی هەرێمی کوردستان کردووەتەوە.

 

زانیاریی زیاتر: بەشێکی دیکەی گفتوگۆکان تایبەت بووە بە ئامادەکارییەکانی هەڵبژاردنی پەرلەمانی کوردستان کە بڕیارە 20-10ی ئەمساڵ بکرێت، سەرۆکوەزیران بارزانی جەختی لە گرنگی بەشداریی چاودێرانی نێودەوڵەتی و بەتایبەتی یەکێتیی ئەوروپا کردووەتەوە، بۆ ئەوەی پرۆسەی هەڵبژاردن بەشێوەیەکی دادپەروەرانە و دوور لە پێشێلکاری و ساختەکاری بکرێت.