باڵەخانەی دەزگای چاودێر موڵکی کێیە؟

ئاڤا نیوز

دوای ئەوەی ئێوارەی ئەمڕۆ هێزێکی کۆماندۆ هەڵیکوتایە سەر دەزگای ڕۆشنگەریی چاودێر لە گردی ئەندازیارانی سلێمانی و دەستی بەسەردا گرت، دامەزراوەی دارایی یەکێتی لە ڕوونکردنەوەیەکدا دەڵێت، "ئەو باڵەخانەیە موڵکی یەکێتییە و لەمەدوا بە دامەزراوەیەکی تر دەدریت" بەڵام ئاڤا نیوز زانیاری دەستکەوتووە خاوەنداریەتی بۆ یەکێتی ناگەڕێتەوە و موڵکی حکومەتە.

زانیاری بەدەستهاتوو: سەرچاوەیەک بە ئاڤا نیوزی ڕاگەیاند: ئەو باڵەخانەیەی ساڵانێکە ناوەندی ڕۆشنگەریی چاودێری لێیە، بەر لە ڕاپەڕینی ئاداری 1991 بینای "ڕیعایەی علمی" بووە و موڵکی حکومەت بووە، دوای ڕاپەڕین وەک موڵکی حکومەت مامەڵەی لەگەڵ کراوە، بەڵام دواتر یەکێتی بۆ کاری حیزبی بەکاریهێناوە، لەدوای ساڵی 2010-ەوە دراوەتە مەلا بەختیار، بووەتە شوێنی بنکەی ڕۆشنگەریی چاودێر و چالاکی ڕۆشنبیری لێ ڕێکخراوە.

ئەوەی پێویستە بیزانیت: لە باڵەخانەی دەزگای ڕۆشنگەریی چاودێر ئەم دامەزراوانە هەبوون: ڕادیۆی مەدەنیەت، پلاتفۆرمی دابڕان، بنکەی گەلاوێژ، ماڵپەڕی گەلاوێژ، ماڵپەڕی چاودێر، ماڵپەڕی ڕوانگە و ڕەخنە، پڕۆژەی پەیکەرسازیی چاودێر، گەلەری چاودێر، هۆڵی کۆنفراسی "شەهید ئازاد هەورامی" و کتێبخانەیەک کە 10 هەزار سەرچاوەی تێدایە.