پەرلەمانتارێکی حیزبوڵڵا: ئیسرائیل باجی هێرشە ئەلیکترۆنییەکە دەدات

ئاڤا نیوز

 

پەرلەمانتارێکی سەر بە حیزبوڵڵای لوبنانی بەرپرسیاریێتی هێرشەکەی لوبنان دەخاتە ئەستۆی ئیسرائیل و دەشڵێ دەبێت باجی ئەو هێرشە بدات، هاوکات حەماسیش لەلایەن خۆیەوە هێرشەکە سەرکۆنە دەکات.

 

چیرۆکی سەرەکی: دوای نیوەڕۆی ئەمڕۆ سێشەممە هێرشێکی ئەلیکترۆنی کرایە سەر ئامێرەکانی پەیوەندیکردنی ئەندامانی حیزبوڵڵای لوبنان و بەهۆیەوە هەزاران چەکداری ئەو حیزبە برینداربوون.

 

لێدوانی فەرمی: ئیبراهیم موسەوی، پەرلەمانتاری حزبوڵڵای لوبنان ڕاگەیاند، بە دڵنیاییەوە ئیسرائیل باجی تاوانەکەی دەدات، ئاماژەی بەوەشکرد، "دوژمن هەزاران هاووڵاتی سڤیلی لوبنانی کردە ئامانج نەک تەنیا چەکدارانی مقاوەمە".

 

لەلایەکی دیکەوە: بزووتنەوەی مقاوەمەی ئیسلامی "حەماس" هێرشی ئیسرائیلی بۆ سەر لوبنان بە تەقاندنەوەی ئامێرە پەیوەندییەکان کە ئەندامانی حیزبوڵڵای کردە ئامانج، سەرۆکۆنە دەکات و ڕایدەگەیێنێت: "دەستدرێژییەکە جیاوازی لە نێوان خەڵکی مەدەنی و چەکدارانی مقاوەمە نەکردووە".

 

قووڵتر: حەماس ئاماژەی بەوەشکردووە، هێرشەکە "تاوانێکە کە سەرپێچیی هەموو یاسا و داب و نەریتەکان دەکات و حکومەتی ئیسرائیل دەبێت تەواوی بەرپرسیاریێتی کاردانەوەکانی ئەو تاوانە هەڵبگرێت".