زیاتر لە 100 هەزار خانەنشینی مەدەنی  پڕۆسەی بایۆمەترییان تەواو کردووە

ئاڤا نیوز

 

پڕۆسەی بایۆمتری بۆ خانەنشینانی مەدەنی و میراتگریان بەردەوامە، ڕۆژانە سەدان کەس سەردانی بەڕێوەبەرایەتییەکانی خانەنشینی پارێزگاکان دەکەن بۆ ڕایی ڕێکارەکانیان، هەر خانەنشینێک ئەو پڕۆسەیەی نەکردبێت مووچەکەی ڕادەگیرێت.

 

وێنە گەورەکە: یەکێک لە تێبینییەکانی بەغدا دەربارەی  پڕۆسەی هاوتاکردنی مووچەی خانەنشینانی مەدەنی هەرێمی کوردستان بە عێراقە، نەبوونی بایۆمتری خانەنشینانی هەرێمی کوردستانە، لە ماوەی سێ هەفتەی ڕابردوو لە کۆی 70 هەزار خانەنشین کە بایۆمەتریان نەبووە ، نزیکەی 30 هەزار کەس پڕۆسەکەیان جێبەجێ کردووە.

 

لێدوانی فەرمی: سارا حەمە نەجیب، بەڕێوەبەری بەشی ژمێریاریی لە بەڕێوەبەرایەتیی خانەنشینی سلێمانی بە ئاڤا نیوزی گوت، "لە کۆی 47 هەزار خانەنشینی مەدەنی، نزیکەی هەزار خانەنشین ماون کە پڕۆسەکە بکەن و ڕۆژانە ئاماری ئەوانەی دەیانەوێ بایۆمتری بکەن بەرز دەبێتەوە."

 

زانیاریی زیاتر: ڕۆژانە 150 بۆ 200 کەس بەمەبەستی تەواوکردنی ڕێکارەکانی بایۆمتری سەردانی بەڕێوەبەرایەتییەکانی خانەنشین، لە هەولێر، سلێمانی، دهۆک و هەڵەبجە دەکەن، چونکە هەر خانەنشینێک بایۆمتری نەبێت مووچەکەی ڕادەگیرێت.

 

ژمارەکان وادەڵێن: ژمارەی خانەنشینانی 149 هەزار و 687 کەسە، لەو ژمارەیە 109 هەزار بایۆمتریان کردووە و بەمشێوەیە بەسەر پارێزگاکاندا دابەش بوون:-

هەولێر: لە کۆی 41 هەزار خانەنشین 37 هەزار کەس بایۆمتریان کردووە.
سلێمانی: 47 هەزار خانەنشین 46 هەزار کەس بایۆمەتریان کردووە.
دهۆک: 20 هەزار خانەنشین 17 هەزاریان بایۆمتریان هەیە.
هەڵەبجە: لە کۆی نۆ هەزار کەس هەشت هەزار و 200 کەس بایۆمتریان کردووە.

 

هۆکارە زانراوەکان: 41 هەزار و 487 خانەنشینی مەدەنی ماون بایۆمتری بکەن، هۆکارەکەی بۆ گۆڕانکاری لە زانیارییەکانیان دەگەڕێتەوە (لەوانە زیادکردنی ساڵی خزمەت یان بڕوانامە)، بەشێکی دیکە ئەوان کە میراتگری خانەشینانن بەشی سێیەم منداڵانی ناکامن کە ئەوان پڕۆسەی بایۆمتری نایانگرێتەوە.