کێشەی بەرزبوونەوەی نرخی خزمەتگوزارییەکانی یەکەی نیشتەجێبوون چارەسەر دەکرێت

ئاڤا نیوز

 

دوای گازەندەی دانیشتوانی دوو یەکەی نیشتەجێبوونی هەولێر لەسەر زیادکردنی نرخی خزمەتگوزارییەکان، دەستەی وەبەرهێنان نرخی خزمەتگوزارییەکان وەک خۆی لێ دەکاتەوە و هۆشداری بە خاوەنی ئەو یەکانە دەدات ئەگەر پابەند نەبن.

 

بۆچی گرنگە: ئەم هەنگاوەی دەستەی وەبەرهێنان ڕێگری لە زیادکردنی نرخی خزمەتگوزاری پرۆژەکانی نیشتەجێبوون دەکات، تاوەکو بەبێ گەڕانەوە بۆ لایەنی پەیوەندیدار نرخەکان دەستکاری نەکەن.

 

لێدوانی فەرمی: بەرگەشت ئاکرەیی، گوتەبێژی دەستەی وەبەرهێنان، بە ئاڤا نیوزی گوت: دوو یەکەی نیشتەجێبوون لە هەولێر بەبێ گەڕانەوە بۆ لایەنی پەیوەندیدار نرخی خزمەتگوزارییەکانیان زیادکردبوو، ئاگادار کرانەوە و بەڵێنیان لێ وەرگیرا نرخەکان وەک خۆی لێ بکەنەوە و چاودێریشیان دەکەین.

 

لەلایەکی دیکەوە: لیژنەیەکی هاوبەش لە نێوان دەستەی وەبەرهێنان و وەزارەتی شارەوانی و چەند لایەنێکی دیکە دروستکراوە، بڕیار لەسەر نرخی خزمەتگوزاری سیتی و یەکە نیشتەجێبووەکانی دیکە دەدەن.

ئەوەی پێویستە بیزانیت: هەر یەکەیەکی نیشتەجێبوون پابەندی بڕیارەکانی ئەو لیژنەیە نەبێت، سەرەتا ئاگادار دەکرێتەوە و دواتر بەگوێرەی یاسا و ڕێنمایەکانی دەستەی وەبەرهێنان مامەڵەی لەگەڵ دەکرێت تاوەکو دەگات بەپێبژاردن.