ئەمساڵ 26 کەس بەهۆی تای خوێنبەربوون لە عێراق گیانیان لەدەست داوە

ئاڤا نیوز

 

وەزارەتی تەندروستی عێراق ئاشکرای دەکات، لە نۆ مانگی ئەمساڵدا 178 تووشبووی نەخۆشی تای خوێنبەربوون لە وڵاتدا تۆمارکراون، لەو ژمارەیەش 26 کەس گیانی لەدەستداوە.

 

وێنە گەورەکە: نەخۆشی تای خوێنبەربوون لە ئاژەڵەوە بۆ مرۆڤ دەگوازرێتەوە و ڕێژەی مردن و پەککەوتنی مرۆڤ بەهۆی ئەو نەخۆشییەوە زۆرە، بۆیەش داپۆشینی گۆشت و پاکو خاوێن ڕاگرتنی لە مێش و مەگەز، دوركەوتنەوە و خۆپارێزی لە كەسانی توشبوو، هاوکات پاککردنەوەی سەتڵی خۆڵ و خاشاك وەک ڕێکاری هەرە سەرەکی بۆ خۆپاراستن لە نەخۆشییەکە ناودەبرێن.

 

لێدوانی فەرمی: سەیف بەدر، گوتەبێژی وەزارەتی تەندروستی عێراق بە ئاڤا نیوزی ڕاگەیاند: لە سەرەتای ئەمساڵەوە 178 توشبووی نەخۆشی تای خوێنبەربوون لە عێراق و هەرێمی کوردستان تۆمارکراون، لەو ژمارەیەش 26 کەس بەهۆی نەخۆشییەکەوە گیانیان لەدەستداوە.

 

ئەوەی پێویستە بیزانیت: زۆرترین توشبووی نەخۆشی تای خوێنبەربوون لە پارێزگاکانی زیقار، نەینەوا و بەغدا تۆمارکراون، لە پارێزگاکانی هەرێمی کوردستانیش توشبوون بە نەخۆشییەکە بەم جۆرەیە:

 

لە پارێزگای دهۆک پێنج توشبوو و یەک حاڵەتی گیانلەدەستدان تۆمارکراوە.

لە پارێزگای هەولێر شەش توشبوو هەیە و هیچ حاڵەتێکی گیانلەدەستدان تۆمارنەکراوە.

لە پارێزگای سلێمانی سێ توشبوو هەیە و هیچ حاڵەتێکی گیانلەدەستدان تۆمارنەکراوە.

 

زانیاریی زیاتر: لە پارێزگای کەرکووکیش چوار توشبووی نەخۆشی تای خوێنبەربوون تۆمارکراوە و یەک حاڵەتی گیانلەدەستدانیش بەهۆی نەخۆشییەکەوە تۆمارکراوە.