شاندی دارایی هەرێمی كوردستان بە دەستی پڕەوە لە بەغدایە

ئاڤا نیوز

 

شاندێكی وەزارەتی دارایی هەرێمی كوردستان ئێستا لە بەغدان و وەڵامی سەرجەم پرسیار و تێبینییەكانی وەزارەتی دارایی عێراق لەبارەی مووچە دەدەنەوە.

 

وێنە گەورەكە: گفتوگۆكانی هەولێر و بەغدا بۆ چارەسەركردنی گرفتی مووچەی فەرمانبەرانی هەرێمی كوردستان بەردەوامە و شاندێكی هەرێمی كوردستان ئێستا لە بەغدایە و شاندێكیش لە بەغداوە دێتە هەولێر.

 

لێدوانی فەرمی: پێشەوا هەورامانی، گوتەبێژی حكومەتی هەرێمی كوردستان بە ئاڤا نیوزی ڕاگەیاند: تیمی تەكنیكیی وەزارەتی دارایی و ئابووریی حكومەتی هەرێمی كوردستان ئێستا لە بەغدان و كۆبوونەوەكانیان دەستیپێكردووە، خشتەی مووچەی مانگەكانی هەشت و نۆ و وەڵامی هەموو پرسیارەكانی وەزارەتی دارایی عێراقیان لەگەڵ خۆیان بردووە.

 

زانیاریی زیاتر: شاندەكەی وەزارەتی دارایی، لەسەر داواكاریی وەزارەتی دارایی عێراق دوایین زانیاریی و ئاماری بایۆمەتریی مووچەیان لەگەڵ خۆیان بردووەتە بەغدا، هاوكات بەدواداچوون بۆ چارەسەركردنی كورتهێنانی 245 ملیار دیناری مووچەی مانگی هەشتی فەرمانبەرانی هەرێمی كوردستان دەكەن.