عێراق هەوڵی سنووردارکردنی فرۆشتنی جگەرە دەدات

ئاڤا نیوز

حکومەت و پەرلەمانی عێراق پێکەوە کار لەسەر ئامادەکردنی ڕەشنووسی پڕۆژەیاسایەک دەکەن بە ناوی یاسای خۆپاراستن بەرامبەر زیانەکانی تووتن، بەگوێرەی پڕۆژەکە فرۆشتنی جگەرە و بەرهەمەکانی تووتن بۆ کەسانی خوار تەمەن 18 ساڵ قەدەغە دەکرێت.

وێنە گەورەکە: بەگوێرەی وەزارەتی تەندروستیی عێراق، ڕۆژانە سێ ملیار دینار بۆ کڕینی جگەرە لە عێراق خەرج دەکرێت و بەگشتی 40% بۆ 50%ـی عێراقییەکان جگەرە دەکێشین.

لێدوانی فەرمی: وەسیم گەیلان، یاریدەدەری بەڕێوەبەری بەرنامەی ڕووبەڕووبوونەوەی زیانەکانی تووتن لە وەزارەتی تەندروستیی عێراق ڕایگەیاند، عێراق ئەندامە لە ڕێککەوتنی ڕێكخراوی تەندروستی جیهانی بۆ ڕووبەڕووبوونەوەی زیانەکانی تووتن لەڕێگەی سەپاندنی باج و کۆنتڕۆڵکردنی بانگەشەکردن بۆ تووتن و بەشە جیاوازەکانی، لەو چوارچێوەیەدا حکومەت و پەرلەمان گەیشتوونەتە ڕەشنووسی کۆتایی پڕۆژەیاسایەک بە ناوی یاسای خۆپاراستن بەرامبەر زیانەکانی تووتن.

ئەوەی پێویستە بیزانیت: پڕۆژەیاساکە نوێکردنەوەی یاسای کۆنترۆڵکردن و بەرەنگاربوونەوەی زیانەکانی تووتنە، بەگوێرەی یەکێک لە بڕگەکانی پڕۆژەیاساکەش فرۆشتنی جگەرە، نێرگەلە و هەموو بەرهەمەکانی دیکەی تووتن بۆ کەسانی خوار 18 ساڵ قەدەغە دەکرێت.