ئیدارەی بایدن لە ئیسرائیل تووڕەیە

ئاڤا نیوز

 

لە هێرشێکی مووشەکیدا سوپای ئیسرائیل هێرشی کردووەتە سەر بارەگای ناوەندی ڕێکخراوی حیزبوڵڵای لوبنان لە باشووری بەیرووت کە ئامانجیان کوشتنی سەرۆکی ئەم ڕێکخراوە بووە. 

 

وێنە گەورەکە: لە دوای زۆر بوونی گرژییەکان، ئەمریکا و کۆمەڵگەی نێودەوڵەتیی هەوڵدەدەن لە ڕێگەی دیپلۆماسییەوە کۆتایی بەم شەڕە بهێنن و ئاگربەستێک ڕابگەیەنن. 

 

ڕاگەیێندراوی فەرمی: بەپێی ڕاپۆرتێکی سی ئێن ئێن، ئیدارەی بایدن پێشنیازێکی تایبەت بە ئاگربەستیان پێشکەش بە نەتانیاهۆ کردووە و ڕەتکراوەتەوە ئەمەش توڕەبوونی بەرپرسانی ئەمریکای بەدوای خۆیدا هێناوە. 

 

زانیاریی زیاتر: پێشنیازەکەی بایدن باس لە ئاگربەستێکی 21 رۆژە دەکات، نەتانیاهۆ لەو بارەیەوە دەڵێت: "بیرۆکەی ئاگربەست لەم کاتەدا دروست نیە و ئێمە بەردەوام دەبین لە هێرشەکانمان بۆ سەر حیزبوڵڵا".  

 

لەلایەکی دیکەوە:  ئاژانسی هەواڵی ڕۆیتەرز بڵاویكردەوە: ئێوارەی ئەمڕۆ فڕۆكە جەنگییەكانی ئیسرائیل زنجیرەیەک هێرشی ئاسمانیان كردە سەر باشووری بەیرووت و دەنگی چەند تەقینەوەیەک بیستراوە، تاوەکو ئێستا باس لە کوشتنی حەسەن نەسڕوڵڵا، ئەمینداری گشتیی حیزبوڵڵای لوبنان دەکرێت، هەر بەهۆی ئەو بۆردومانەوە دوو کەس کوژراون و 73 کەسیش برینداربوون.