باڵیۆزخانەی عێراق لە دیمەشق ڕێنمایی نوێ بۆ ئاوارەکانی لوبنان دەردەکات

ئاڤا نیوز

باڵیۆزخانەی عێراق لە دیمەشقی پایتەختی سووریا، ڕێنمایی نوێ بۆ هەموو هاووڵاتییانی لوبنان دەردەکات کە بەهۆی بارودۆخی ئەمنی لوبنانەوە ئاوارەی سووریا بوون.

 

وێنە گەورەکە: بەهۆی پەرەسەندنی شەڕی نێوان سوپای ئیسرائیل و حیزبوڵڵا، تاوەکو ئێستا سەدان کەس کوژراون و بە سەدانی دیکەش بریندار بوونە، ئەمە جیا لە ئاوارەبوونی هەزاران کەس لەنێوخۆی وڵاتەکە بۆ دەرەوەی لوبنان، لە نێویشیاندا عێراق و سووریا.

 

ڕاگەیێنراوی فەرمی: باڵیۆزخانەی عێراق لە دیمەشق بۆ هاوکاریکردنی خەڵکی لوبنان چوار فەرمانی دەرکرد و بڵاوی کردەوە :  

یەکەم : هەر هاووڵاتییەکی لوبنانی پاسپۆرتی ئەو وڵاتەی هەبێت دەتوانێت لە ڕێگەی فڕۆکەخانەی نێودەوڵەتی دیمەشق یان لە ڕێگەی وشکانییەوە لە دەروازەی سنووری ئەلبوکەمال - قائیمەوە بەبێ ڤیزە بچێتە نێو خاکی عێراقەوە.

دووەم: ڕێگە بە هاووڵاتییانی لوبنان دەدرێت بە ئۆتۆمبێلی تایبەتی خۆیان لەڕێگەی دەروازە سنوورییەکانەوە بچنە نێو خاکی عێراقەوە، بەو مەرجەی ئۆتۆمبێلەکە هەڵگری تابلۆی لوبنان بێت.

سێیەم: هەر هاووڵاتییەکی لوبنانی پاسپۆرتی نەبێت دەتوانێ سەردانی عێراق بکات، لەڕێگەی باڵیۆزخانەی لوبنانەوە لە دیمەشق کەبەشێوەیەکی کاتی بەڵگەنامەی گەشت یاخود پاسپۆرتی پەڕینەوەی پێ دەدرێت و تەنیا بۆ چوونە نێو خاکی عێراق بەکاردێت .

چوارەم: هاوسەری بەڕەچەڵەک سووری، بە یاوەری هاوسەرە لوبنانییەکەی دەتوانێت ڤیزا لە سنوورەکانی نێوان عێراق و سووریا بە خۆڕایی و بەبێ هیچ بڕە پارەیەک وەربگرێت و بچێتە نێو خاکی عێراقەوە.