ئاری هەرسین وەک بەرپرسی لقی 4ی پارتی لە سلێمانی دەستنیشان کرا

ئاڤا نیوز

گۆڕانکارییە نێوخۆییەکانی پارتی دیموکراتی کوردستان سنووری سلێمانیشی گرتەوە و ئاری هەرسین وەک بەرپرسی لقی چوار دەستنیشان کرا.

وێنە گەورەکە؛ پارتی وەکو گەورەترین حیزبی باشووری کوردستان، ماوەیەکە بۆ ڕێکخستنەوەی ڕیزەکانی و ئامادەکاری بۆ ھەڵبژاردنی پەرلەمانی کوردستان، دەستی بە گۆڕانکاری لە لق و بەش و مەکتەبەکان کردووە، گۆڕانکارییەکەش سەرجەم ناوچەکانی گرتووەتەوە.

چیرۆکی سەرەکی: ئەمڕۆ دووشەممە لە بەردەوامیی گۆڕانکارییەکان، ئاری هەرسین وەک بەرپرسی لقی چوار دەستبەکار بوو، سەعید سەلیم ئاغا، بەرپرسی پێشووی لقەکەش کراوەتە بەرپرسی مەکتەبی ڕێکخستنی پێشمەرگەی پارتی کە بارەگاکەی لە پیرمامە.

لێدوانی فەرمی: سەعید سەلیم ئاغا بە ئاڤا نیوزی گوت، بە بڕیاری سەرۆک مەسعود بارزانی گۆڕانکارییەکە کراوە و پۆستەکەی وەرگرتووە.


باکگراوند؛ لە کۆنگرەی 14ی پارتی کە مانگی 11ی ساڵی 2022 بەسترا، ئاری هەرسین کە ئەندامی سەرکردایەتی بوو، نەیتوانی دەنگی پێویست بەدەستبهێنێت و ببێتە ئەندامی ئەنجوومەنی ناوەندی، دواتریش لە مانگی ئایاری 2023 وازهێنانی لە حیزبەکەی ڕاگەیاند .

ئەوکات ئاری هەرسین لە ڕوونکردنەوەیەکدا گوتی:"بڕیاری دەستلەکارکێشانەوەم شەخسییە و پەیوەندی بە پلە و پۆست‌ و ئیمتیازاتەوە نییە". دواتریش لەسەر داوای سەرۆک بارزانی پاشگەزبووەوە و گەڕایەوە ناو پارتی.