وەزیرێکی ئیسرائیل: ڕەنگە شوێنگرەوەی حەسەن نەسروڵڵا کوژرابێت

ئاڤا نیوز

 

وەزیری بەرگریی ئیسرائیل ڕایدەگەیێنێت، ڕەنگە هاشم سەفییەدین، شوێنگرەوەی حەسەن نەسروڵڵا بەهۆی بۆردوومانەکانیانەوە کوژرابێت.

 

بۆچی گرنگە: دوای کوژرانی حەسەن نەسروڵڵا، ئەمینداری گشتیی حیزبوڵڵا لە ڕۆژی 27 ـی مانگی نۆ لە بۆردوومانێکی سوپای ئیسرائیل بۆ سەر بینایەک لە بەیرووتی پایتەختی لوبنان، قسەی زۆر لەسەر شوێنگرەوەکەی حەسەن نەسروڵڵا دەکرا و دەگوترا هاشم سەفییەدین کە یەکێکە لە سەرکردە باڵاکانی ئەو حیزبە، شوێنی دەگرێتەوە.

 

لێدوانی فەرمی: یوواڤ گالانت، وەزیری بەرگریی ئیسرائیل ئەمڕۆ سێشەممە ڕایگەیاند: " حیزبوڵڵا ئێستا بێ سەرکردەیە، نەسروڵڵا کوژرا، شوێنگرەوەکەشی ڕەنگە کوژرابێت، ئەوان ئێستا کەسیان نییە بڕیاریان بۆ بدات."

 

لەلایەکی دیکەوە: "ئەو هەنگاوانەی لە ڕۆژهەڵاتی ناوەڕاست دەیانگرینەبەر بەوردی بیرمان لێکردوونەتەوە، کاتێک دووکەڵی لوبنان دەنیشێتەوە، ئێران دەزانێت چ شتێکی بەنرخیان لەدەست داوە کە حیزبوڵڵایە." گالانت وادەڵێت.

 

بۆچوونی بەرامبەر: تائێستا  حیزبوڵڵا هیچ لێدوانێكی لەبارەی کوژرانی هاشم سەفییەدینەوە نەداوە.

 

ئەمەش بزانە: لەدوای کورژانی نەسروڵڵاوە، سەفییەدین لەگەڵ  نایم قاسم، جێگری ئەمینداری گشتیی حیزبوڵڵا کاروبارەکانی حیزبوڵڵایان بەڕێوەبردووە.