گەنجانی سلێمانی بۆ دەستکەوتنی هەلی کار ڕوو لە هەولێر دەکەن

 ئاڤا نیوز 

 

گەنجانی سلێمانی بەمەبەستی هێنانەدی خەون و جێبەجێکردنی پڕۆژە ئابوورییەکانیان و دەستکەوتنی هەلی کار دەچنە هەولێر. 

 

وێنە گەورەکە: دروشمە سەرەکییەکانی یەکێتی لە ڕابردوودا، 'ئارامی، هەلی کار، ئاوەدانی، بوون و تەنها لە چوارچێوەی دروشم ماونەتەوە، هەر بۆیە بەشێک لە گەنجانی ئەو شارە بۆ دەستکەوتنی هەلی کار ڕوو لە شاری هەولێر دەکەن.

 

لێدوانی فەرمی: ئەزمیر محەممەد، گەنجێکی سلێمانییە و لە ساڵی 2021وە چووەتە هەولێر باسی لەوەکردووە: ئەو بە دانانی دووکانێکی فرۆشتنی کەلوپەلی ناوماڵ دەستیپێکرد، ئێستا کارەکەی پەرەپێداوە و بووەتە خاوەنی کۆمپانیا و بڕاندێکی تایبەت بە خۆی هەیە، بەرهەمەکەی لە سێ وڵاتدا دەفرۆشێت و دەرفەتی کاریشی  بۆ 30 گەنجی دیکە ڕەخساندووە.

 

ئەمەش بزانە: لەماوەی کارکردنی کابینەی نۆیەمی حکومەتی هەرێمی کوردستان، لە سەرجەم پارێزگاکان 977 کارگە مۆڵەتیان وەرگرتووە، هاوکات 15 هەزار گەنج لە ڕێگەی کارگەکانی پیشەسازییەوە کاریان دەست کەوتووە، هەروەها  بەگوژمەی 16 ملیار دینار لە 11 سێکتەری جیاواز وەبەرهێنان کراوە، لەو ڕێگەیەوە 130 هەزار هەلی کار ڕەخسێنراوە، 9 هەزار و 500  گەنجیش لە قەرزی بچووک سوودمەند بوون.