ئەمریکا سیستەمی بەرگریی مووشەکی بۆ ئیسرائیل دەنێرێت

ئاڤا نیوز

 

لە چوارچێوەی پاڵپشتییەکانی بۆ هاوپەیمانەکەی، ئەمریکا سیستەمێکی دژە مووشەکەی بۆ تێلئەڤیڤ دەنێرێت. 

 

ڕاگەیێنراوی فەرمی: پات ڕایدەر، وتەبێژی پێنتاگۆن ڕایگەیاند، ''ئەم هاوکارییە لە ژێر ڕۆشنای جۆ بایدن سەرۆکی ئەمریکایە، کە هەمیشە دەیەوێت لەگەڵ ئیسرائیل بوەستێت و بێ  دوودڵی یارمەتی پێشکەش بکات''. 

 

ئەوەی پێویستە بیزانیت: ئیسرائیل دەیەوێت وەڵامی هێرشەکەی ئێران بداتەوە، ئەم هاوکارییەی ئەمریکاش بە تایبەت بۆ پشتیوانیکردنە ''لە ئیسرائیل و پاراستنی ئەمریکییەکان لە هێرشەکانی ئێران و گرووپە چەکدارەکانی سەر بە ئێران”

 

لەلایەکی دیکەوە: عەباس عێراقچی وەزیری دەرەوەی ئێران، هۆشداری دابوو کە ئەمریکا بەم هەوڵەی ژیانی سەربازەکانی دەخاتە مەترسییەوە.

 

ئەوەش بزانە: سیستەمەکە ناوی T‌HAADــە دژە مووشەکی بالیستیکییە و توانای هەڵدانی هەشت مووشەکی هەیە لەیەک کاتدا.

 

باکگراوند: دوای هێرشی تۆڵەسەندەوەی ئێران بۆ کوژرانی حەسەن نەسروڵڵا کە لە ڕۆژی 1ی 10 بە زیاتر لە 100 مووشەک هێرشی کردە سەر ئیسرائیل، گرژییەکانی نێوانیان زیادی کرد، و ئێستا ئیسرائیل خۆی بۆ هێرشی پێچەوانە ئامادە دەکات.