عێراق لە ڕێگەی فۆڕمێكەوە بەدوای ئێزدییە بێسەروشوێنەكاندا دەگەڕێت

ئاڤا نیوز

دوای چەندین ساڵ لە نەبوونی هیچ هەوڵێکیان، حکومەتی عێراق بە دروستکردنی فۆڕمێک دەیەوێت بەدوای ئێزدییە بێسەروشوێنەکاندا بگەڕێت.

لێدوانی فەرميی: سەراب ئیلیاس، بەڕێوەبەری گشتیی فەرمانگەی ڕزگاربووان لە عێراق بە ئاڤا نیوزی ڕاگەیاند: دەست بە دروستکردنی فۆڕمێکی ئەلیکترۆنی دەکەین بۆ تۆمارکردنی ناوی ئەو هاووڵاتییە ئێزدیانەی چارەنووسییان نادیارە کە لەلایەن داعشەوە ڕفێنرابوون، تاوەکو ئێستا بێسەروشوێنن.

ئەوەی پێویستە بیزانیت: لە ساڵی 2014ـەوە، بۆ یەکەمجارە حکومەتی عێراق هەوڵێک بدات، بۆ دیاريکردنی چارەنووسی ئەو ئێزدیانەی کە لەلایەن داعش ڕفێنراون و تا ئێستا بێسەروشوێنن.

لەلایەکی دیکەوە: ماوەی چەند ساڵێكە حکومەتی هەرێمی کوردستان، نووسینگەیەکی تایبەتی بە کاروباری ڕفێنراوان کردووەتەوە و تاوەکو ئێستا سێ هەزار و 576 کەسی ڕزگارکردووە. 

باکگراوند: ڕۆژی 3-8-2014، داعش هێرشی کردە سەر سنووری شەنگال و كۆمەڵكوژی ئەنجامدا و شەش هەزار و 417 هاووڵاتیی ڕفاند.