مەندەلاوی پێش کۆبوونەوەی پەرلەمان لەگەڵ سەرۆک فراکسیۆنەکان کۆدەبێتەوە

ئاڤا نیوز

 

موحسین مەندەلاوی، سەرۆکی بەوەکالەتی پەرلەمانی عێراق پێش کۆبوونەوەی پەرلەمان لەگەڵ ئەندامانی لیژنەی یاسایی و سەرۆکی فراکسیۆنەکان و ئەندامانی چەند لیژنەیەکی دیکە کۆبووەوە، داوای لێکردن پێداچوونەوە بۆ بڕگە مشتومڕاوییەکانی پەیوەست بە هەمواری یاسای باری کەسی و یاسای لێبوردنی گشتی تەواو بکەن.

 

وێنە گەورەکە: بڕیارە ڕۆژی یەکشەممە پەرلەمانی عێراق کۆببێتەوە بۆ دەنگدان و خوێندنەوەی ژمارەیەک هەموواری یاسا لەوانەش، هەمواری یاسای گەڕاندنەوەی خاوەندارێتی موڵک و ماڵی داگیرکراو بەفەرمانی ئەنجوومەنی ناسراو بە "قیادەی سەورە"ــی هەڵوەشاوە و دەنگدان لەسەر هەمواری یاسای باری کەسیی و دەنگدان لەسەر یاسای لێبوردنی گشتی.

 

ڕاگەیێنراوی فەرمی: نووسینگەی میدیایی سەرۆکی پەرلەمانی عێراق ڕایگەیاند: لە کۆبوونەوەکەدا بەقووڵی گفتوگۆ لەسەر بڕگەکانی ئەو پڕۆژەیاسایانە کرا کەوا بڕیارە ڕۆژی یەکشەممە گفتوگۆی لەسەر بکرێت، وەکو یاسای باری کەسی، هەمواری دووەمی یاسای لێبوردنی گشتی و پرۆژە یاسای گەڕاندنەوەی خاوەندارێتی موڵك و ماڵی خاوەنەکانی و یاسای خانەنشینی حەشدی شەعبی.

 

زانیاریی زیاتر: پەرلەمانی عێراق خوێندنەوەی یەکەم بۆ ڕەشنووسی یاسای خاوەندارێتی فیکری تەواو دەکات و تەواوکردنی خوێندنەوەی یەکەم بۆ ڕەشنووسی یاسای فڕۆکەوانی مەدەنی.