ئاڤا وردەکاری سەردانەکەی قاسم ئەعرەجی بۆ هەولێر ئاشکرا دەکات

ئاڤا نیوز

ئەمڕۆ ڕاوێژکاری ئاسایشی نەتەوەیی عێراق بە سەردانێک گەیشتە هەولێر، وەزارەتی ناوخۆی هەرێمی کوردستانیش دەڵێت، "گفتوگۆ لەسەر ڕێککەوتنە ئەمنییەکان و ئاڵۆزی ناوچەکەی لەگەڵدا دەکەین".

 

وێنە گەورەکە: ڕۆژی 27-10-2024، قاسم ئەعرەجی، ڕاوێژکاری ئاسایشی نەتەوەیی عێراق گەیشتە هەولێر، بڕیارە چەند دیدار و کۆبوونەوەیەک لەگەڵ گەورە بەرپرسانی هەرێمی کوردستان ئەنجام بدات.

 

لێدوانی فەرمی: سەرچاوەیەک لە وەزارەتی ناوخۆ بە ئاڤا نیوزی گوت: "قاسم ئەعرەجی میوانی سەرۆک بارزانی و سەرۆکوەزیران مەسرور بارزانییە، هاوکات دوو کۆبوونەوەی جیای لەگەڵیان دەبێت".

 

زانیاریی زیاتر: سەبارەت بە ئامانجی سەردانەکە، سەرچاوەکەی وەزارەتی ناوخۆ ئاماژەی بەوەدا: ئامانج لە سەردانەکەی ئەعرەجی گفتوگۆکردنە لەسەر پەرەسەندنەکانی شەڕ لە ناوچەکە، هەروەها باسی ڕێککەوتنە ئەمنییەکانیش دەکرێت، لە نێویاندا بابەتی هێزە ئۆپۆزیسییۆنەکانی ئێران تەوەرێکی دیکەی گفتوگۆکان دەبێت.

 

لەلایەکی دیکەوە: نووسینگەی قاسم ئەعرەجی، ڕاوێژکاری ئاسایشی نەتەوەیی عێراق ڕایگەیاند: قاسم ئەعرەجی لەسەر ڕاسپاردەی محەممەد شیاع سودانی' سەرۆکوەزیران و  فەرماندەی هێزە چەکدارەکان سەردانی هەولێری کردووە.

ئەوەی پێویستە بیزانیت: ڕۆژی چوارشەممەی ڕابردوو، سەرۆکوەزیرانی عێراق لەگەڵ ئەنجوومەنی وزاری ئاسایشی نیشتیمانیی کۆبووەوە و تاوتوێی دۆخی ئەمنی سنوورەکانی عێراق و تورکیایان کرد، چونکە دوای هێرشەکەی سەر ئەنقەرە، تورکیا ناوچە سنوورییەکان بۆردوومان دەکات.