ئەو لایەنانەی دەنگی کەمیان هێناوە گومان لە بێگەردی هەڵبژاردن دەکەن

 

ئاڤا نیوز

 

بەشێک لە لایەنە سیاسییەکان پێش 20ـی ئۆکتۆبەر و بەڕێوەچوونی پڕۆسەی هەڵبژاردن، پەیامیان بۆ خەڵکی ئەوە بوو ساختەکاری ناکرێت، بەڵام دوای هەڵبژاردن و کەمکردنی دەنگەکانیان قسەکانیان تەواو پێچەوانەیە. 

 

وێنە گەورەکە: 20ـی ئۆکتۆبەر پڕۆسەی هەڵبژاردن بۆ خولی شەشەمی پەرلەمانی کوردستان بەڕێوەچوو، کۆمیسیۆنی باڵای سەربەخۆی هەڵبژاردنەکان دوای 24  کاتژمێر ئەنجامی بەرایی ڕاگەیاند، هاوکات بەشێک لە کاندیدە سەربەخۆکان و ئەو هێزانەی دەنگیان کەمیک کردووە ئەنجامەکانیان ڕەتکردەوە و باس لە بوونی ساختەکاری دەکەن.

 

لێدوانە فەرمییەکان: پێش ئەنجامدانی پڕۆسەی هەڵبژاردن، کەسی یەکەمی لایەنە سیاسییەکان، لەوانە ڕەوتی هەڵوێست، نەوەی نوێ، کۆمەڵی دادگەری، یەکگرتووی ئیسلامی، بانگەشەی ئەوەیان دەکرد و خەڵکیان هاندەدا کە ڕوو لە ناوەندەکانی دەنگدان بکەن، چونکە دەیان گوت ئەمجارە کۆمیسیۆنی باڵای عێراق پرۆسەکە بەڕێوەدەبات و سەختەکاری نەماوە، بەڵام دوای ڕاگەیاندنی ئەنجامە بەراییەکان قسەکانییان تەواو پێچەوانەی پێش هەڵبژاردن بوو. 

 

- عەلی حەمەساڵح، سەرۆکی ڕەوتی هەڵوێست پێش هەڵبژاردن دڵنیایی بە خەڵکی دەدا لە پارێزروای پرۆسەی هەڵبژاردن و هانیان دەدان بۆ بەشداریکردن.

- شاسوار عەبدولواحید، سەرۆکی جوڵانەوەی نەوەی نوێ لە پەیامێکدا ڕایگەیاندبوو: دڵنیایە ئەم جارە هەڵبژاردنی پاک و بێ ساختەکاری دەکرێت.

 

- یەکێکی دیکە لەو لایەنانە کۆمەڵی دادگەری بوو کە پێش هەڵبژاردن، عەلی باپیر، سەرۆکی ئەو حیزبە گوتبووی:  لە هەڵبژاردنی ئەم جارەدا دەرفەتی ساختەکاری نییە.

- یەکگرتووی ئیسلامیی و بەرپرسانی ئەو حیزبە دڵنیاییان دەدا لەوەی ساختەکاری ناکرێت، خودی سەڵاحەددین بەهائەدین، ئەمینداری گشتیی حیزبەکە لە گوتارێکیدا گوتی: "لەبارەی نەبوونی ساختەکاری دڵنیاییمان لە کۆمیسیۆن وەرگرتووە".

- بەشێک لە چاودێرانی هەڵبژاردن دەڵێن: ئەوانەی دەیانگوت ساختەکاری ناکرێت، ئێستا شکستی خۆیان پێ قبووڵ ناکرێت، بۆیە کەوتوونەتە تانەلێدان لە ئەنجامەکانی هەڵبژاردن.

- یەکێتی پێش هەڵبژاردن یەکێک بوو لەو لایەنانەی جەختی دەکردەوە نە ساختەکاری دەکرێت و نە ناوی مردووەکان بەکاردەهێنرێن، وەک بانگەشە چەند جارێک بافڵ تاڵەبانی ئەم وتانەی ئاراستەی جەماوەری حیزبەکەی دەکرد.

ئەوەی پێویستە بیزانیت: کات تێپەڕی و هەڵبژاردن کرا، پارتی بە بەدەستهێنانی زۆرترین دەنگ یەکەمی کوردستان بوو و بەشێکی  لایەنەکانی دیکەش  بەهۆی کەمی دەنگەکانیانەوە گوتیان ساختەکاری کراوە و ئەنجامەکان ڕەتدەکەنەوە.