ژمارەی تووشبووانی سكچوون و ڕشانەوە لە شارەزوور گەیشتە هەزار و 500 كەس

ئاڤا نیوز 

سێ ڕۆژە نەخۆشیی سكچوون و ڕشانەوە لە قەزای شارەزوور بڵاوبووەتەوە، ئاماری تووشبووان بەردەوام لە زیادبوونە و زۆرینەیان منداڵن.

زانیاریی پەیامنێر: بەپێی زانیاری و بەدواداچوونی ئاراس ڕەفیق، پەیامنێری ئاڤا لە شارەزوور، ژمارەی تووشبووانی سكچوون و ڕشانەوە لە سنووری قەزای شارەزوور گەیشتووەتە نزیكەی هەزار و 500 كەس و ژمارەكە لەزیادبوونە.

زانیاریی زیاتر: نەخۆشخانەی شەهید ڕەئوف بەگ، نەخۆشخانەی گشتیی قەزاكەیە و زۆرینەی تووشبووەكان براون بۆ ئەو نەخۆشخانەیە، بەڵام بەهۆی بچووكیی نەخۆشخانەكە و كەمیی شوێنی خەواندن، زۆرینەی نەخۆشەكان خێرا دەرمانیان دراوەتێ و ڕەوانەی ماڵەوە كراونەتەوە.

ئەوەش بزانە: بەپێی بەدواداچوونی ئاڤا نیوز، ژمارەی تووشبووان زیاترە لەوەی تۆمار كراوە، بەهۆی ئەوەی بەشێك لە تووشبووەكان نەچوونەتە نەخۆشخانەی گشتیی قەزاكە و لە نۆرینگەكان چارەسەریان وەرگرتووە، بەشێكی دیكەشیان چوونەتە هەڵەبجە و سلێمانی.

ئەوەی پێویستە بیزانیت: ڕزگار غەفوور، قایمقامی شارەزوور ڕایگەیاند، بەدواداچوونیان كردووە و دەركەوتووە هۆكاری بڵاوبوونەوەی نەخۆشییەكە، لافاوی چەند ڕۆژی ڕابردووە كە بووەتە هۆی پیسبوونی ئاوی خواردنەوەی ماڵان.