ژمارەی تووشبووان بە سکچوون و ڕشانەوە لە شارەزوور گەیشتە هەزار و 560 کەس

ئاڤا نیوز

 

وەزیری تەندروستی نوێترین ئاماری تووشبووانی سكچوون و ڕشانەوە لە شارەزوور ئاشكرا دەكات، دەشڵێ تاوەكو چەند ڕۆژێكی دیكە تووشبووی نوێ تۆمار دەكرێن.

لێدوانی فەرمی: د.سامان بەرزنجی، وەزیری تەندروستیی حكومەتی هەرێمی كوردستان، بۆ ئاڤا نیوز ئەو دەنگۆیەی ڕەتكردەوە كە گوایە ژمارەی تووشبووان بە سكچوون و ڕشانەوە لە شارەزوور زیاتر بێت لە دوو هەزار كەس و گوتی: تاوەکو ئێستا هەزار و 560 تووشبوو تۆمارکراون و تەنیا 70 نەخۆش لە نەخۆشخانە ماون.

لەلایەكی دیكەوە: وەزیری تەندروستی ئاماژەی بە هۆکارەکان و چارەسەر کرد و گوتی، لیژنەی وەزارەتی تەندروستی سەردانی شارەزووری كردووە و بۆیان دەركەوتووە كە هۆكاری بڵاوبوونەوەی نەخۆشییەكە تێكەڵبوونی ئاوی ئاوەڕۆ و ئاوی ڕووبارە لە دەڤەرەكە، ئێستا تیمی فەرمانگە پەیوەندیدارەكان سەرقاڵی چارەسەركردنین.

زانیاریی زیاتر: زۆرینەی نەخۆشەكان سەردانی نەخۆشخانەی شەهید ڕەئوف بەگیان لە شارەزوور كردووە، سەبارەت بە پێداویستییە پزیشكییەكانی نەخۆشخانەكە، د. سامان بەرزنجی ئاماژەی بەوە کرد كە هەموو پێداویستییەك بۆ نەخۆشخانەكە تەرخان كراوە و لەو ڕووەوە هیچ كەموكوڕییەك نییە.

ئەوەش بزانە: وەزارەتی تەندروستی ڕێنوێنی دانیشتووانی قەزای شارەزوور دەكات كە تاوەكو گرفتەكە بە تەواوی چارەسەر دەكرێت ئاوی ماڵەكانیان نەخۆنەوە.