وەزارەتی ناوخۆ ئەو ئەنجامانە ڕەتدەکاتەوە کە لەبارەی سەرژمێریی بڵاودەکرێنەوە

ئاڤا نیوز

 

وەزارەتی ناوخۆی عێراق ئەو ئەنجامانە ڕەتدەکاتەوە کە لەبارەی سەرژمێریی دانیشتووان لە پارێزگاکاندا بڵاوکراونەتەوە، جەختیش دەکاتەوە کە تاوەکو ئێستا پرۆسەی سەرژمێریی بەردەوامە و هیچ ئەنجامێکی فەرمی بڵاونەکراوەتەوە.

 

وێنە گەورەکە: حکومەتی عێراق ئاشکرای کردووە کە دوای ئەوەی کاتژمێر 12:00ـی ئەمشەو پڕۆسەی سەرژمێریی کۆتایی هات، 48 کاتژمێر دواتر ژمارەی دانیشتووانی پارێزگاکان و تەواوی عێراق بە فەرمی بڵاودەکاتەوە.

 

ڕاگەیێنراوی فەرمی: وەزارەتی ناوخۆی عێراق بڵاوی کردەوە، ئەو زانیارییانە ڕەتدەکەنەوە کە لە بەشێک لە تۆڕە کۆمەڵایەتییەکان بڵاوکراونەتەوە و ئاماژەیان بە دەرئەنجامەکانی سەرژمێریی و ژمارەی دانیشتووانی پارێزگاکان کردووە، جەختیش دەکاتەوە کە ئەو ژمارانە ڕاست نین و پشتیان بە هیچ بنەمایەکی باوەڕپێکراو نەبەستووە، چونکە تاوەکو ئێستاش پڕۆسەی سەرژمێری بەردەوامە.

 

زانیاریی زیاتر: ئەنجامی سەرژمێریی تاوەکو کۆتاییهاتنی پرۆسەکە کە ئەمڕۆشی ماوە ڕاناگەیێنرێت، تەنیا لیژنەی باڵای سەرژمێریی لایەنی ڕێگەپێدراوە بۆ ڕاگەیاندنی دەرئەنجامەکان.