ڕاپۆرتێکی ئەمریکی: گرووپێکی چەکداری سعوودی لە خاکی عێراقەوە هێرش دەکاتە سەر ئیسرائیل

ئاڤا نیوز

ڕاپۆرتێکی ئەمریکی ڕایدەگەیێنێت گرووپێک بەناوی "مقاوەمەی ئیسلامی لە بیلاد حەرەمەین" لەناو خاکی عێراقەوە بە هاوکاری و فڕۆکەی بێفڕۆکەوانی سەر بە کەتیبەکانی حیزبوڵڵا و ئەنساروڵڵا هێرش دەکاتە سەر ئیسرائیل.

 

‏وێنە گەورەکە: لە چەند هەفتەی ڕابردوو دا، گروپێکی نوێی ڕووکەش بە ناوی "مقاوەمەی ئیسلامی لە بیلاد حەرەمەین" بەرپرسیارێتی چەند هێرشێکی درۆنی بۆ سەر ئیسرائیل ڕاگەیاند.

 

بڵاوکراوەی فەرمی: بەپێی ڕاپۆرتێکی پەیمانگەی واشنتن بۆ سیاسەتی ڕۆژهەڵاتی نزیک ئاماژە بەوەش دراوە، ئەو گرووپەی ئەو ناوەی لەخۆ ناوە، ڕەنگە پەیوەندی بە تووندڕۆکانی سەر بە ئێران هەبێت لە سعودیە کە ئەوانیش ناویان "بلاد حەرەمەین شەریفەین"ـە.

 

پێدراوە ڕاستییەکان: بۆ یەکەمجار لە 25-10-2024 "مقاوەمەی ئیسلامی لە بیلاد حەرەمەین" لە ڕاگەیێنراوێکدا بەرپرسیاریێتی خۆی لە هێرشیکی درۆنی بۆسەر ئامانجێک لە ئیسرائیل لەنێو خاکی سعودییەوە ڕاگەیاند.

 

زانیاریی زیاتر: مقاوەمەی ئیسلامی لە بیلاد حەرەمەین، بەپێی ڕاپۆرتەکە تاوەکو ئێستا بەرپرسیاریێتی شەش هێرشی لە ڕێگە درۆنەوە بۆسەر ئامانجەکانی ئیسرائیل لە غور ئوردن، ئیلات، یافا لە ئەستۆ گرتووە و گرووپەکەش کورتە ڤیدیۆی ئەو هێرشانەی بڵاوکردووەتەوە.

 

ئەوەی لەوبارەیەوە دەگوترێت: بەپێی ڕاپۆرتەکەی پەیمانگەی واشنتن بەشێکی زۆری دیمەنەکانی ئەم گرتە ڤیدیۆیانە لێڵ کراون بۆ ڕێگریکردن لە ناسینەوەی هەڵکەوتە جوگرافییەکەی، بەڵام ئەوەی لە دیمەنەکانەوە دەبینرێت جیاوازە لەو شوێنانەی کە بەزۆری لە ڤیدیۆکانی بەرەی مقاوەمەی ئیسلامی لە عێراق دەبنیرێت.

 

بەتەنیشت ئەم بابەتەوە: هەر بەپێی ڕاپۆرتەکە، سەرەڕای ئەوەی گرووپەکە ناویان لەخۆیان ناوە "مقاوەمەی ئیسلامی لە بیلاد حەرەمەین" بەڵام هەموو بەڵگەکان ئاماژە بۆ ئەوە دەکەن گرووپەکە لەلایەن مقاوەمەی عێراقییەوە دروستکراوە، ئەو زمانەی لە لێدوانەکانیاندا بەکاری دەهێنن، تا ڕاددەیەکی زۆر ڕەنگدانەوەی ئەو زمانەیە کە "مقاوەمەی ئیسلامی لە عێراق" بەکاری دەهێنێت، هاوکات شێوازی گرتە ڤیدیۆکانیشیان لە کاتی هەڵدانی درۆنەکان هەمان ئەو شێوازەیە کە مقاوەمەی عێراقی بەکاری دەهێنێت.

 

كێ بەشدارە: ڕاپۆرتەکە ئاماژەی بەوەشکردووە، هەرچەندە دەگوترێت میلیشیا عێراقییەکان ژمارەیەکی سنووردار لە چەکدار و مەشقپێکراوی چەکداری سعودی و وڵاتانی دیکەی کەنداوی هەبێت، بەڵام ڕەنگە ئەو سعودیانەی لەو هێرشانە تێوەگلاون لەلایەن چەکدارە عێراقییەکانەوە سەرکردایەتی بکرێن.