بەشار ئەسەد: ئەوەی لە سووریا ڕوودەدات هەوڵێکە بۆ دابەشکردنی ناوچەکە

ئاڤا نیوز 

 

سەرۆککۆماری سووریا باس لە "ئامانجی دوورمەوداکان" دەکات و گرژییەکانی باکووری وڵاتەکەی بە هەوڵێک بۆ دابەشکردنی ناوچەکە و دووبارە کێشانەوەی نەخشەکان ناو دەبات.

 

چیرۆکی سەرەکی: بەشار ئەسەد، سەرۆکی سووریا لە پەیوەندییەکی تەلەفۆنیدا لەگەڵ هاوتا ئێرانییەکەی مەسعوود پزیشکیان ڕۆژی دووشەممە ڕایگەیاند: "ئەو پەرەسەندنە تیرۆریستییەی کە ڕوودەدات، ڕەنگدانەوەی ئامانجێکی دوورمەودایە لە هەوڵدان بۆ دابەشکردنی ناوچەکە و پارچەپارچەکردنی وڵاتەکان".

 

لێدوانی فەرمی: بە گوتەی بەشار ئەسەد "ئامانجی پەرەسەندنە تیرۆریستییەکان بۆ دووبارە داڕشتنەوەی نەخشەکانە، بەگوێرەی بەرژەوەندی و ئامانجەکانی ئەمریکا و ڕۆژئاوا."

 

لەلایەکی دیکەوە: مەسعوود پزیشکیان، سەرۆککۆماری ئێران ڕایگەیاند، "ئێران هەموو هەوڵێک بۆ تێکدانی یەکڕیزی و سەقامگیری سووریا بە تەواوی ڕەت دەکاتەوە و لاوازکردنی یەکێتی سووریا گورزێکە بۆ ناوچەکە و سەقامگیری و یەکێتی وڵاتانی ناوچەکە".

 

پزیشکیان، ئامادەیی وڵاتەکەی دەربڕی بۆ "پێشکەشکردنی هەموو جۆرە پشتیوانییەک بۆ سووریا بە مەبەستی لەناوبردنی تیرۆر و پوچەڵکردنەوەی ئامانجەکانی ئەوانەی ئەم کارە دەکەن لەگەڵ پشتیوانەکانیان".