شانەی ڕاگەیاندنی ئەمنیی عێراق بۆ ئاڤا: دڵنیایی دەدەین سنوورمان لەگەڵ سووریا پارێزراوە

ئاڤا نیوز

 

عێراق ڕێکاری تووندی لەسەر سنوور لەگەڵ سووریا گرتووەتەبەر و دڵنیایی دەدات کە دۆخی سنووری سووریا بێ کێشەیە و بە هیچ شێوەیەک "تیرۆریستان" ناتوانن دزە بکەنە سنووری عێراق.

 

وێنە گەورەکە: بەهۆی سەرهەڵدانەوەی شەڕ لە سووریا مەترسی گەیشتنی گرووپە چەکدارەکان بۆ نزیک سنووری عێراق زیادی کردووە و بۆ ڕێگریکردن لە هەر مەترسییەک ڕێکاری نوێ دەگرێتەبەر.

 

لێدوانی فەرمی: لیوا تەحسین خەفاجی، سەرۆکی شانەی ڕاگەیاندنی ئەمنیی عێراق بە ئاڤا میدیای ڕاگەیاند: دڵنیایی دەدەمە کورد و عەرەب و  هەموو گەلی عێراق کە بارودۆخی سنووری سووریا ئارامە، ئەوەش بەهۆی ئەو ڕێکارانەی ئێستا و پێشووتر گرتوومانەتەبەر بە درێژایی 610 کیلۆمەتر و هاوکاریی بەرزمان لەگەڵ هێزەکانی پێشمەرگە هەیە و هیچ بۆشاییەک لەسەر سنوور نییە و تیرۆریستان ناتوانن دزە بکەنە ئەم دیوی سنوور.

 

زانیاریی زیاتر: لیوا خەفاجی لەبارەی چەکدارانی داعش گوتی: بەردەوامین لە گەڕان بەدوای چەکدارانی داعش و بەردەوام بۆردوومانیان دەکەین و تەنیا ئەمساڵ هێزە ئاسمانییەکان 150 تیرۆریستیان کوشتووە.