زانیاریی ئاڤا: یەكێتی پرسی دواكەوتنی مووچە وەك فشار بۆ وەرگرتنی پۆستی زیاتر بەكاردەهێنێت

ئاڤا نیوز

 

بەهۆی ڕەوانەنەکردنی بڕە پارەی پێویست بۆ مووچەی مانگەكانی كۆتایی ئەمساڵ لەلایەن بەغدا كە بەهۆیەوە دابەشكردنی مووچەی مانگی ئۆكتۆبەر دواكەوتووە، یەكێتی دەیەوێت ئەو بابەتە وەك کارتێک بۆ بەرژەوەندی خۆی بەكاربهێنێت، و بەهۆیەوە پۆستی زیاتر لە كابینەی داهاتووی حكومەتی هەرێمی كوردستان دەستبكەوێت.

 

زانیاریی بەدەستهاتوو: ئاڤا میدیا زانیویەتی یەكێتی بەشێك لە فەرمانبەرانی سنووری خۆی ڕاسپاردووە بەبیانووی دابەشنەكردنی مووچەی مانگی 10، دەست بە بایكۆت و خۆپیشاندان بكەن  ئەوەش لە چوارچێوەی دروستكردنی فشار بۆ وەرگرتنی پۆستی زیاتر لە كابینەی داهاتووی حكومەتی هەرێمی كوردستان.

 

لێدوانی فەرمی: مەرد عەلی خاڵە، ئەندامی خولی شەشەمی پەرلەمانی كوردستان بە ئاڤای ڕایگەیاند، ئەم هەوڵەی یەكێتی نابەجێیە و هەوڵێکە بۆ پەکخستنی دانووستان و لێكنزیكبوونەوە لەپێناو سازانی نیشتیمانی.

 

ئەو پەرلەمانتارەی پارتی ئاماژە بۆ ئەوە دەکات، هاندانی خەڵک بۆ زیادکردنی فشارەکان لەسەر حکومەتی هەرێمی کوردستان کە وابەستەی کۆمەڵێک هوتاف و بانگەشەی بێ بنەما بێت، خزمەت بە سەقامگیری هەرێمی كوردستان و دەرکەوتنی وەک یەکەیەکی كارگێڕیی یەکگرتوو بەرامبەر گۆڕانکارییە نێوخۆیی و هەرێمیەکان ناکات، کە لەئێستادا پێویستییەکی پڕبەهایە بۆ خەڵکی کوردستان. 

 

 مەرد عەلی خاڵە لەبارەی ڕەوانەنەکردنی مووچەی مووچەخۆران لەلایەن عێراقەوە دەڵێت، بۆ هەموو لایەك ئاشكرا و ڕوونە كە پرسی مووچە و شایستە داراییەكانی مووچەخۆرانی هەرێمی كوردستان لەلایەن حکومەتی عێراقەوە یاری پێدەکرێت و ناپابەندیی هەیە بە بڕیاری دادگای فیدڕاڵی، کە جەخت لە جیاکردنەوەی بابەتی مووچە لەهەموو پرسێكی دیكە دەکاتەوە.

 

ئەوەی پێویستە بیزانیت: بەكارهێنانی پرسی دواكەوتنی مووچەی فەرمانبەران لەكاتێكدایە کە تەنانەت پەرلەمانتارانی هێز و لایەنە جیاجیاکانیش کە نوێنەرایەتی خەڵکی کوردستان دەکەن، درک بەو ڕاستییە دەکەن و نایشارنەوە کە ئەوە بەغدایە پابەندییەکانی لە بابەتی مووچە جێبەجێ ناکات و کەمتەرخەمە.