یەکەم لێدوانی ترەمپ لەبارەی شەڕی سووریا: ئەمریکا پەیوەندی بە ململانێکانەوە نابێت

ئاڤا نیوز

 

شەڕ لە سووریا گەیشتووەتە دەورووبەری دیمەشق و سوپای سووریاش بەردەوام لە پاشەکشێدایە، ئۆپۆزیسیۆنیش لە پێشڕەویدایە و چەندین ناوچەی نوێی کۆنترۆڵ کردووە، سەرۆکی هەڵبژێردراوی ئەمریکاش بۆ یەکەمجار پەیامی هەیە.

 

وێنە گەورەکە: جیهان چاوی لەسەر سووریایە و چاودێری دۆخەکە دەکەن بۆئەوەی بزانن چی دەگوزەرێت و چۆن ئۆپۆزیسیۆنی سووریا بەخێرایی پێشڕەوی دەکات و لە چەندین ناوچەش، بەتایبەتی لە نزیک دیمەشق بەرەوپێشەوە دەچن.

 

ڕاگەیەنراوی فەڕمی: دۆناڵد ترەمپ، سەرۆکی هەڵبژێردراوی ئەمەریکا ڕایگەیاند: ئۆپۆزیسیۆنی سووریا بۆ ڕووخاندنی ڕژێمی ئەسەد بەخێرایی لە پێشڕەویی دایە و بەشار ئەسەد دۆستی ئێمە نییە.

 

سەرۆکی هەڵبژێردراوی ئەمریکا لەبارەی دۆخی ئێستای سووریا هەڵوێستی خۆیشی دەربڕی و دەڵێت، ئەمریکا نابێت پەیوەندی بە ململانێکانی ئەو وڵاتەوە هەبێت.

 

ئەمەش بزانە: لەوکاتەوەی وەک سەرۆکی ئەمریکا هەڵبژێردراوە، ئەمە یەکەمجارە ترەمپ لەبارەی سووریاوە قسەدەکات و پەیامێکی توندی لەوشێوەیەی هەبێت.