ئەنجوومەنی وەزیران لەسەر پرسی مووچە کۆدەبێتەوە

ئاڤا نیوز

 

ئەنجوومەنی وەزیرانی هەرێمی کوردستان لەسەر سێ تەوەری جیاواز کۆدەبێتەوە، گرنگترینیان دوایین پێشهاتی مووچە و هەموارکردنەوەی یاسای بودجەی گشتیی فیدڕاڵی ساڵی دارایی 2025 ـە.

 

وێنە گەورەکە: 16 ڕۆژ ماوە بۆ تەواوبوونی ساڵی دارایی لە عێراق، بەڵام لە کۆی زیاتر لە سێ تریلیۆن دینار کە تێچووی مووچەی سێ مانگی مووچەخۆرانی هەرێمی کوردستانە، وەزارەتی دارایی حکومەتی فیدڕاڵی تەنیا 761 ملیار دیناری بۆ مووچەی مانگی 10 ناردووە و 335 ملیار دینار کورتهێنانی هەیە، ڕوون نییە کە بە چ میکانیزمێک ئەو کورتهێنانە پڕ دەکرێتەوە.

 

زانیاریی بەدەستهاتوو: لە کۆبوونەوەی ڕۆژی چوارشەممە 11-12-2024، ئەنجوومەنی وەزیران هەڵوەستە لەسەر چەند تەوەرێک دەکات.

ـــ دوایین پێشهاتەکانی مووچەی مووچەخۆرانی هەرێمی کوردستان، هەموارکردنەوەی یاسای بودجەی گشتیی فیدڕاڵ و خشتەکانی هاوپێچی یاساکە بۆ ساڵی دارایی 2025.

ـــ خستنەڕووی پێشنیاری هاوتاکردنی ناونیشانی وەزیفی فەرمانبەرانی هەرێمی کوردستان لەگەڵ حکومەتی فیدڕاڵی، کە ژمارەیەک ناونیشانی وەزیفی نوێ تۆمارکراون و هەندێکی دیکە هەڵوەشێنراونەتەوە.

ـــ خستنەڕووی ڕاپۆرتێک لەسەر دۆخی پێکهاتەکان لەلایەن وەزیری هەرێم بۆ کاروباری پێکهاتەکان.

ـــــ تاوتوێکردنی دوایین پێشهات و ڕووداوەکانی ئەم دواییەی سووریا.