وەزیری دەرەوەی ئێران: چاوەڕوان دەکرێت ململانێکان بۆ عێراقیش بگوازرێنەوە

ئاڤا نیوز

 

وەزیری دەرەوەی ئێران ڕایدەگەیێنێت، ئەو ململانێیەی ئێستا ناوچەکەی گرتووەتەوە پێشبینی دەکرێت بۆ عێراق و تەواوی ناوچەکە بگوازرێتەوە.

 

وێنە گەورەکە: پەرەسەندنەکانی ئەم دواییەی ناوچەکە بە ڕووخانی ڕژێمەکەی بەشار ئەسەد لە سووریا کۆتاییهات و ناوچەکەش بە گشتی بە دۆخێکی ئاڵۆزدا تێدەپەڕێت بەهۆی ئەو لێکەوتانەی لە سووریا ڕوودەدات. عێراقیش هەموو ڕێوشوێنێکی لەسەر سنوورەکانی لەگەڵ سووریا گرتووەتەبەر.

 

لێدوانی فەرمی: عەباس عێراقچی، وەزیری دەرەوەی ئێران ڕایگەیاند، پێشبینی دەکرێت ململانێکان نەک تەنیا بۆ عێراق، بەڵکو بۆ هەموو ناوچەکە تەشەنە بکات و ئاماژەی بۆ ئەوەش کرد "بۆ گرووپە جیاوازەکانی سووریا ئاسان نابێت لەسەر حکومەتی ئایندە ڕێک بکەون".

 

لەلایەکی دیکە: پێشتر لە لێدوانێکدا عێراقچی ڕایگەیاندبوو: بەشار ئەسەد، سەرۆکی پێشووی سووریا هەرگیز داوای یارمەتی لە تاران نەکردووە کە پشتیوانی سەرەکی بووە لەگەڵ ڕووسیا بۆ ڕووبەڕووبوونەوەی هێرشی هێزەکانی ئۆپۆزیسیۆن کە بە ڕووخانی ڕژێمەکەی کۆتاییهات.

 

ئەوەی پێویستە بیزانیت: ڕۆژی یەکشەممە 08-12-2024 هێزەكانی ئۆپۆزیسیۆنی سووریا گەیشتنە دیمەشقی پایتەختی ئەو وڵاتە و كەوتنی دەسەڵاتی بەشار ئەسەدیان ڕاگەیاند.