چی دەزانیت لەبارەی جەژنی ڕۆژووی ئێزدییەكان؟

ئاڤا نیوز

 

ڕۆژی 15ـی دیسێمبەری هەموو ساڵێك هاوكاتی جەژنی ڕۆژووی ئێزدییەكانە، کە تیایدا كوردانی ئێزدی لە ناوخۆی كوردستان و دەرەوە ئەم ڕۆژە پیرۆز ڕادەگرن.

 

وێنە گەورەكە: ئێزدییەكان ساڵانە لە ڕۆژانی 12و 13 و 14ـی كۆتا مانگی ساڵ سێ ڕۆژ بەڕۆژوو دەبن و ڕۆژی چوارەم كە هاوكاتە لەگەڵ ڕێككەوتی 15ـی دیسێمبەر، جەژنی ڕۆژووی ئێزدییەكان بەڕێوەدەچێت. 

 

ئەوەی پێویستە بیزانیت: لەو سێ ڕۆژەدا ئێزدییەکان نوێژی تایبەت بە خۆیان دەکەن، لە خواردن و خواردنەوە و چێژوەرگرتن لە ژیان و کارکردن خۆیان بەدوور دەگرن.

 

زانیاریی زیاتر: دوای ئەو سێ ڕۆژە، لە ڕۆژی جەژندا سەرجەم پەیڕەوانی ئایینی ئێزدی بەرەبەیانی زوو دەچنە گۆڕستانەکان و خێر و بەخششی مردووەکانیان بەسەر خەڵکی هەژار و كەمدەرامەتی دەوروبەریان دابەش دەکەن.

 

ڕاگەیێنراوی فەرمی: ئەنجوومەنی جڤاكی و ڕۆشەنبیریی بنكەی لالش بە بۆنەی هاتنەوەی جەژنی ڕۆژووی ئێزدییەكان پیرۆزبایی لە كوردانی ئێزدی دەكات و داوای گەردەن ئازایی لەنێوانیان خۆیان و خزم و كەسوكاریان دەكات.

 

باكگراوند: ئێزیدییەكان ساڵانە حەوت جەژنیان هەیە و لەدوای جەژنی چوارشەممەی سوور، جەژنی بەڕۆژووبوون پیرۆزترین جەژنی ئێزدییه‌كانه‌.