هۆشداریی لەبارەی گەڕانەوەی پەنابەرانی سووریا دەدرێت

ئاڤا نیوز

 

بەهۆی شەڕی ناوخۆیی سووریا کە لەنێوان دەسەڵاتی بەشار ئەسەد و چەکدارانی ئۆپۆزسیۆن ڕوویدا چەندین ساڵی خایاند و دواجار بە ڕووخاندنی دەسەڵاتی 53 ساڵەی بنەماڵەی ئەسەد کۆتاییهات، کە بەوهۆیەوە ژمارەیەکی زۆری مین و تەقەمەنی لە ناوچە جیاوازەکانی سووریا بڵاوبووەتەوە یان چێنران، ئێستا هۆشداریی دەدرێت کە لە داهاتوودا هەڕەشەیەکی جددی بۆ سەر ژیانی خەڵک لە سووریا دروست دەکات.

 

بڵاوکراوەی فەرمی: ڕێکخراوی 'هاڵۆ تراست' کە کار لەسەر هەڵگرتنەوەی مین لە ناوچەکانی شەڕ بەتایبەت لە ئیدلیب و ڕۆژئاوای حەلەبی سووریا دەکات، هۆشداری لەگەڕانەوەی ئاوارەکان بۆ ناوچەکانی خۆیان دەدات، بە تایبەت بۆ ئەو ناوچانەی شەڕیان تێدایە و گومان دەکرێت بڕێکی زۆر تەقەمەنی هەبێت و دەیان هەزار مینیش چێنرابێت.

 

لێدوانی فەرمی: دامیان ئۆبراین، بەرپرسی مەلەفی سووریا لە ڕێکخراوی هەڵگرتنەوەی مین ڕایگەیاند: ئەم مینانە بەسەر کێڵگە و گوند و شارەکاندا بڵاوبوونەتەوە، ئەمەش لە ئێستا و داهاتوودا ژیانی خەڵک دەخاتە مەترسییەوە.

 

زانیاریی زیاتر: ڕێکخراوەکە داوای هاوکاری نێودەوڵەتیی بەپەلە دەکات بۆ نەهێشتن و هەڵگرتنەوەی مین و تەقەمەنی لە سووریا، چونکە ژیانی هەزاران سووری لەمەترسییدایە. هاوکات بەهۆی گەڕانەوەی ئاوارەکان بۆ ئەو ناوچانەی لەدەست دەسەڵاتەکەی ئەسەد ڕزگار کراون، مەترسییەکان زیاتر دەبن.