کارەبای عێراق لەڕێگەی ئاڤاوە وادەی دەستپێکردنەوەی هاوردەی غازی ئێران دەخاتەڕوو

ئاڤا نیوز

 

وەزارەتی کارەبای عێراق دەڵێت، ڕاگرتنی هاوردەی غازی ئێران کاریگەری بەرچاوی لەسەر کاتژمێرەکانی کارەبای نیشتیمانیی هەبووە، جەختیش دەکاتەوە کە چاوەڕوان دەکات لە چەند ڕۆژی داهاتوودا دووبارە هاوردەی غازی ئەو وڵاتە دەستپێبکاتەوە.

 

ئەوەی پێویستە بیزانیت: 24ی مانگی ڕابردوو بەهۆکاری نۆژەنکردنەوەی هێڵی غاز لە ناو خاکی وڵاتەکەیدا، ئێران هەناردەی غازی بۆ عێراق بۆ ماوەی 15 ڕۆژ ڕاگرت، ئەوەش کاریگەری لەسەر کەمبوونەوەی کاتژمێرەکانی کارەبای نیشتیمانیی هەبوو.

 

لێدوانی فەرمی: ئەحمەد عەبادی، وتەبێژی وەزارەتی کارەبای عێراق بە ئاڤا نیوزی ڕاگەیاند، ئێران بەردەوامە لە چاکسازیکردن لە هێڵی گواستنەوەی غازی وڵاتەکەی بۆ عێراق و بەوهۆیەش سێ هەفتەیە هاوردەی غازی ئێران بۆ عێراق ڕاگیراوە، ئەوەش کاریگەری لەسەر دۆخی کارەبا لە زۆربەی ناوچەکان هەبووە.

 

بەوتەی عەبادی، بڕیاربوو دوو شەممەی ڕابردوو هاوردەی غاز دەستپێبکاتەوە بەڵام لایەنی ئێرانی ئاگاداریکردوونەتەوە کە پێویستییان بە 15 ڕۆژی دیکەش هەیە، لەو ماوەیەش هەفتەیەک تەواوبووە و هەفتەیەکی دیکە ماوە، بۆیە ئەوانیش وەک وەزارەتی کارەبا چاوەڕێن هەناردەی غاز دوای ئەو ماوەیە دەستپێبکاتەوە.