لە هەولێر دابەشکردنی غازی ماڵان دەبێتە فۆڕم

ئاڤا نیوز

 

بە مەبەستی ڕێکخستنی دابەشکردنی نرخی غازی ماڵان و بێ بەش نەبوونی هاووڵاتییان، قائیمقامی هەولێر بڕیاریداوە لە ڕێگەی کۆبۆنێکی تایبەتەوە ساڵی ئایندە غاز دابەش بکرێت.

 

چیرۆکی سەرەکی: لە سەرەتای ساڵی داهاتووەوە، فۆڕمێکی تایبەت لەلایەن قائیمقامیەتی ناوەندی هەولێرەوە ئامادە دەکرێت و لەڕێگەی موختارەکانەوە فۆڕمەکە دەدرێت بە هەر خێزانێک و مانگانە دەتوانن لە ڕێگەی ئەو فۆڕمەوە دوو بتڵ غاز بە نرخی حکومی وەربگرن. 
 
لێدوانی فەرمی: نەبەز عەبدولحەمید، قائیمقامی هەولێر، بە ئاڤا نیوزی ڕاگەیاند: لە وەرزی زستاندا خواست لەسەر غاز زیاتر دەبێت بەهۆی بەکارهێنانی بۆ خۆ گەرمکردنەوە، بۆیە بڕیارمانداوە دابەشکردنی غاز لە ڕێگەی فۆڕمەوە بێت تاوەکو هیچ خێزانێک بێ بەش نەبێت. 

 

زانیاریی زیاتر: لەبارەی دەنگۆی وەرگرتنی پارە لە بەرامبەر دابەشکردنی فۆڕمەکە، قائیمقامی هەولێر ڕەتیکردەوە ئەو پارەیە لەلایەن حکومەتەوە وەربگرێت، وتی دەکرێت ئەو پارەیە لەلایەن موختارەکانەوە وەربگرێت بۆ کۆپی کردنی فۆڕمەکان. 

 

ئەوەی پێویستە بیزانیت: ساڵانە لەگەڵ هاتنی وەرزی زستان و زیادبوونی خواست لەسەر غازی ماڵان، نرخی غاز بەرز دەبێتەوە، پارێزگای هەولێر دەیەوێت ئەو بەرزبوونەوەیە کۆنتڕۆڵ بکات.