دوای 13 ساڵ قەتەر باڵیۆزخانەی خۆی لە دیمەشق دەکاتەوە

ئاڤا نیوز

دوای کەوتنی دەسەڵاتی بەشار ئەسەد و دوای 13 ساڵ جارێکی دیکە وڵاتی قەتەر باڵیۆزخانەی خۆی لە سووریا دەکاتەوە.

 

چیرۆکی سەرەکی: هاوکات لەگەڵ کەوتنی دەسەڵاتی بەشار ئەسەد بەشێک لە وڵاتانی ناوچەکە لە هەوڵی ئەوەدان پەیوەندییەکانیان لەگەڵ حکومەتی داهاتووی سووریا ئاسایی بکەنەوە، ڕۆژی ڕابردوو شاندێکی دیبلۆماسی قەتەر گەیشتە ئەو وڵاتە بە مەبەستی هەماهەنگی بۆ کردنەوەی باڵیۆزخانەی نوێی وڵاتەکەیان لە دیمەشق. 

 

ڕاگەیێنراوی فەرمی: وتەبێژی وەزارەتی دەرەوەی قەتەر "ماجد ئەنساری" لە لێدوانێکیدا بۆ ئاژانسی هەواڵی قەتەر ڕایگەیاند: وەفدەکە لە کۆبوونەوەکانیدا لەگەڵ حکومەتی کاربەڕێکەری سووریا، پابەندی دۆ‌حەیان بۆ پشتیووانیکردن لە گەلی سووریا دووپات کردووەتەوە.

 

زانیاریی زیاتر: چوارشەممەی ڕابردوو، دۆحە دووپاتی کردەوە کە باڵیۆزخانەکەی لە دیمەشق دەکاتەوە دوای تەواوکردنی ڕێوشوێنە پێویستەکان.

 

باکگراوند: باڵیۆزخانه‌ی قه‌ته‌ر له‌ دیمه‌شق له‌ مانگی 7ی تەمموزی ساڵی 2011ە‌وه‌ تاوەکو ئێستا بەداخراوی ماوەتەوە‌، ئەم داخستنەشی لەسەروبەندی سەرهەڵدانی خۆپیشاندانەکان بوو لە سووریا.