سبەی یەکێتی و پارتی لەبارەی پرسی مووچە کۆدەبنەوە

ئاڤا نیوز 

 

وتەبێژی یەكێتیی نیشتمانیی كوردستان ڕاگەیاند، شاندی یەكێتیی و پارتی كە بۆ پێكهێنانی حكومەت دیاریكراون لەپیرمام كۆدەبنەوە و پرسی مووچەش تاوتوێ دەکەن. 

 

وێنە گەورەكە: شاندی دانوستاندنکاری پارتی و یەکێتی وەک براوەی یەکەم و دووەمی هەڵبژاردن گەڕی دووەمی گفتوگۆکانیان لەبارەی پێکهێنانی حکومەت دەستپێدەکەن و سبەی سێشەممە لە پیرمام کۆدەبنەوە.

 

لێدوانی فەرمی: سەعدی ئەحمەد پیرە وتەبێژی یەكێتی راگەیاند: "سبەینێ 17-12-2024، شاندی یەكێتیی نیشتمانیی كوردستان و پارتی دیموكراتی كوردستان كە بۆ پێكهێنانی حكومەت دیاریكراون لەپیرمام كۆدەبنەوە".

 

وتەبێژی یەكێتیی راشیگەیاند: "پرسی مووچەی مووچەخۆرانی هەرێم تەوەرێكی دیكەی كۆبوونەوەكە دەبێت، لەكاتێكدا مووچەخۆران چەند مانگێكە مووچەكانیان وەرنەگرتووەو ئەمەش لێكەوتەی خراپی لەسەر ژیانی خەڵك و دەوامی خوێندنگەو فەرمانگەكان هەیە".

 

لە لایەکی دیکەوە: دڵشاد شەهاب، ئەندامی شاندی دانوستانکاری پارتی بە ئاڤا نیوزی ڕاگەیاند، لە کۆبوونەوەی سبەینێدا جگە لە پێکهێنانی حکومەتی نوێ، دوایین پێشهاتەکانی ناوچەکە بەتایبەت دۆخی سووریا گفتوگۆی نێوان شاندی هەردوولا دەبێت. 

 

باکگراوند: شاندی پارتی پێکهاتوون لە هۆشیار زێباری، پشتیوان سادق، دڵشاد شەهاب و ئومێد سەباح، هاوکات شاندی یەکێتی لە قوباد تاڵەبانی، ڕزگار حاجی، دەرباز کۆسرەت، ڕێواز فایەق و  شاڵاو شێخ سەڵاح پێکدێن، ئاماج ڕەحیمیش بۆ شاندەکە زیادکراوە.