وەزارەتی دەرەوەی ئەمریکا لە نان و چا: لەگەڵ هەموو لایەنەکانی سووریا پەیوەندیمان هەیە

ئاڤا نیوز

 

وتەبێژی هەرێمیی وەزارەتی دەرەوەی ئەمریکا ڕایدەگەیێنێت لەگەڵ سەرجەم هێزەکانی سووریا پەیوەندییان هەیە و چاویان لەوەیە حکومەتی نوێی وڵاتەکە بە زووترین کات پێکبهێنرێت.

 

چیرۆکە سەرەکییەکە: ڕۆژی 8ی دیسێمبەر دوای 13 ساڵ شەڕی ناوخۆیی و ململانێی نێودەوڵەتی، هێزەکانی ئۆپۆزیسیۆنی سووریا بە سەرکردایەتیی تەحریرولشام چوونە ناو دیمەشقی پایتەخت و کۆتاییان بە دەسەڵاتی 53 ساڵەی بنەماڵەی ئەسەد هێنا. ئێستا حکومەتێکی ڕاگوزەر سووریا بەڕێوەدەبات و کۆمەڵگەی نێودەوڵەتیش چاودێریی دەکەن.

 

لێدوانی فەرمی: مایکڵ میشێل، وتەبێژی هەرێمیی وەزارەتی دەرەوەی ئەمریکا لە بەرنامەی نان و چای ئاڤا میدیا ڕایگەیاند: چاومان لەوەیە بزانین سووریای نوێ چۆن دەبێت و لەگەڵ هەموو لایەنەکانیش پەیوەندیمان هەیە.

 

بەتەنیشت ئەم بابەتەوە: داهاتووی کورد لە سووریا بابەتێکی گەرمی جێی گفتوگۆی سووریای نوێیە. ئەمریکا هەمیشە کورد وەک هاوبەشێکی سەرەکی خۆی لە ڕووبەڕووبوونەوەی تیرۆر ناودەبات. لە باسی مامەڵەی ئەمریکا لەگەڵ لایەنەکانی نێو سووریای نوێ، مایکڵ میشێل وتی "لەگەڵ هاوبەشەکانمان دەمێنینەوە".

 

چی ڕوودەدات: دوای ڕووخانی ئەسەد، بەشێکی زۆری ئاوارە و پەنابەرانی سووریا دەگەڕێنەوە وڵاتەکەیان. بەرپرسە ئەمریکییەکە دەڵێت "بەلامانەوە گرنگە تەواوی ئاوارەکان کە دەگەڕێنەوە سووریا بە ئارامی بژین".