ئەنجوومەنی ئاسایش: پرۆسەیەکی سیاسی بەسەرۆکایەتیی سوورییەکان دەستپێبکات

ئاڤا نیوز

 

ئەنجوومەنی ئاسایشی نێودەوڵەتی لەبارەی سووریا کۆبووەوە و ڕایگەیاند، پێویستە پرۆسەی نوێی سیاسی لەو وڵاتەدا کۆکەرەوەی هەمووان بێت و خودی سوورییەکان سەرۆکایەتی بکەن، داواش لە وڵاتان دەکات دەستوەردان لە کارووباری ناوخۆی سووریادا نەکەن.

 

ئەوەی پێویستە بیزانیت: شەوی ڕابردوو بەکاتی هەرێمی کوردستان، کۆبوونەوەی ئەنجوومەنی ئاسایشی نێودەوڵەتی لەبارەی دۆخی سووریا بەڕێوەچوو، ئەوەش هاوکاتە لەگەڵ بەردەوامی هێرش و هەڕەشەی گرووپە چەکدارەکانی نزیک لە تورکیا بۆسەر ڕۆژئاوای کوردستان.

 

ڕاگەیێنراوی فەرمی: ئەنجوومەنی ئاسایشی نێودەوڵەتی دوای کۆتاییهاتنی کۆبوونەوەکە، لە ڕاگەیێنراوێکدا ئاماژەی بەوەشكردوە، پرۆسەی نوێی سیاسی لە سووریادا پێویستە ڕەنگدانەوەی خواستی سوورییەکان بێت و هەمووان بپارێزێت، هەروەها دەبێت هاوکاری سوورییەکان بێت تا بەڕێگەیەکی ئاشتی، سەربەخۆ و دیموکراسی داهاتووی خۆیان دیاریبکەن.

 

ئەنجوومەنی ئاسایش داوای ڕێزگرتن لە سەروەری سووریاش دەکات، هاوکات بە گرنگیشی دەزانێت سووریا و وڵاتانی دراوسێی دەستوەردان لەکارووباری یەکتردا نەکەن و ئاسایشی یەکتریی بپارێزن.