هەژماری بانکی بۆ خانەنشینان و کەسوکاری شەهیدان و خاوەن پێداویستییە تایبەتەکان دەکرێتەوە

ئاڤا نیوز

 

وەزیری دارایی هەرێمی کوردستان ڕایدەگەیێنێت، هەژماری بانکی بۆ خانەنشینان و کەسوکاری شەهیدان و خاوەن پێداویستییە تایبەتەکان دەکرێتەوە.

 

وێنە گەورەکە:  ئاوات شێخ جەناب، وەزیری دارایی  هەرێمی کوردستان لەگەڵ تیمی سەرپەرشتیاری پڕۆژەی 'هەژماری من' کۆبووەوە و گفتوگۆیان لەبارەی هەنگاوەکانی پڕۆژەکە لەسەر ئاستی پارێزگاکان کرد.

 

ڕاگەیێنراوی فەرمی: وەزارەتی دارایی ڕایگەیاند: تاوەکو ئێستا نزیکەی 700 هەزار فەرمانبەر و مووچەخۆر لەڕێگەی هەشت بانکەوە خۆیان تۆمارکردووە، زیاتر لە 318 هەزار کارتی بانکی دابەش کراوە، 306 ئامێری ڕاکێشانی پارە بەردەستن، نزیکەی 221 هەزار مووچەخۆریش بەشێوەی دیجیتاڵی مووچەی مانگی 11 وەردەگرن.

 

خاڵی ئەرێنی: ئامادەکاری بۆ کردەوەی هەژماری بانکی بۆ سەرجەم خانەنشینان و کەسوکاری شەهیدان و خاوەن پێداویستییە تایبەتەکان دەکرێت، هاوکات کارئاسانی تەواویان بۆ دەکرێت، لە ساڵی داهاتووەوە پڕۆژەکە ڕادەستی وەزارەتی دارایی دەکرێت.

 

ئەوەی پێویستە بیزانیت: سەرۆکوەزیرانی عێراق لای خۆیەوە وەزارەت و کۆمپانیاکانی ڕاسپاردووە، بۆ ئەوەی پەیوەندییەکانیان لەگەڵ بانکە ئەهلییەکان پتەو بکەن، بەتایبەت لە بواری کردنەوەی هەژماری بانکی و پێدانی سولفە و قەرزی بەڵگەنامەیی، هەروەها هاوکاریکردن بۆ بەرەوپێشبردنی پارەدانی ئەلیکترۆنی و تەوتینکردنی مووچەی فەرمانبەران.