مەحما خەلیل: 600 خانمی ئێزدی لە كەمپی هۆلدان

ئاڤا نیوز

 

مەحما خەلیل، ئەندامی ئەنجوومەنی نوێنەرانی عێراق ئاشكرای دەكات، زانیارییان هەیە 600 خانمی ئێزدی لە كەمپی 'هۆل'ـدابن.

 

وێنە گەورەكە: 10 ساڵ لەمەوبەر تیرۆرستانی داعش هێرشیان كرده‌سه‌ر دەڤەری شنگال، نزیکەی پێنج هەزار ئێزدییان کۆمەڵکوژ كرد و شەش هەزارو 417 کەسیشیان ڕفاند.

 

لێدوانی فەرمی: مەحما خەلیل، ئەندامی ئەنجوومەنی نوێنەرانی عێراق و قایمقامی پێشووی قەزای شنگال لەڕێگەی ئاڤاوە داوا لە حكومەتی هەرێمی كوردستان و ڕێكخراوە جیهانییەكان دەكات هەوڵەكانیان چڕتر بكەنەوە بۆ گەڕاندنەوەی ئەم ئێزدییانە بۆ نێو كەسوكاریان لە هەرێمی كوردستان.

 

ئەوەی پێویستە بیزانیت: كەمپی هۆل دەكەوێتە ڕۆژئاوای كوردستان و لەژێر حكومڕانی هێزە كوردییەكاندایە، كەمپەكە هەزاران ژن و منداڵی ئەندامانی داعشی لێ نیشتەجێ كراوە.

 

زانیاریی زیاتر: بەگوێرەی ئامارەكانی نووسینگەی ڕزگارکردنی ڕفێندراوانی دەستی داعش، سەرەڕای ڕزگاركردنی سێ هەزار و 576 کەس لە ڕفێندراون، تا ئێستا دوو هەزار و 841 کەسیان بێسەروشوێنن.