هەسەدە: داعش كردە تیرۆرستییەكانی لە دێرەزوور دەستپێكردووەتەوە

ئاڤا نیوز

 

هێزەكانی سووریای دیموكرات ڕایدەگەیەنێت، داعش دەرفەتی لە هێرشەكانی توركیا وەرگرتووە و كردە تیرۆرستییەكانی لە دێرەزوور دەستپێكردووەتەوە.

 

وێنە گەورەكە: چەند ڕۆژێكە دۆخی ئەمنی سووریا گرژی تێ كەوتووە، لەلایەك بەهۆی ناكۆكی نێوان هێزە ئەمنییەكانی سەر بە ئیدارەی نوێی سووریا و پاشماوە سەربازییەكانی بەشار ئەسەد شەڕ دروستبووە کە كوژراو و برینداری لێكەوتووەتەوە، لەلایەكی دیكەش ئیدارەی خۆبەڕێوەبەریی ناوچەكانی ڕۆژئاوای كوردستان ترسی لە جووڵەكانی توركیا و هاوكارییەكانی بۆ گروپە چەكدارەكان لەو ناوچانە هەیە.

ڕاگەیێنراوی فەرمی: كەناڵی ڕۆناهی نزیك لە هەسەد هەواڵێكی لە سەرچاوە ئەمنییەكانی ئیدارەی خۆبەڕێوەبەریی ڕۆژئاوای كوردستان بڵاوكردووەتەوە و تێیدا هاتووە، داعش لە شارۆچكەی مركەدە لە دێرەزۆر هێرشێكی تیرۆرستی ئەنجامداوە و بەهۆیەوە ئەندامێكی هێزە ئەمنییەكانی ئیدارەی خۆبەڕێوەبەریی كوژراوە. 

هەسەدە ئاماژەی بەوەشكردووە، داعش لە شارۆچكەی شوحێل ئۆتۆمبێلێكی هێزە ئەمنییەكانی بەئامانج گرتووە و بەهۆیەوە چەكدارێك كوژراوە.

 

هەسەدە دەڵێت، بەهۆی جموجۆڵەكانی داعش لە ناوچەكانی باكوور و ڕۆژئاوای سووریا دۆخی سەقامگیری ئەو ناوچانە شڵەژاوە.