لێکۆڵەرێکی سیاسی یەمەنی بۆ ئاڤا: حووسیەکان خۆشیان نازانن مووشەکەکانیان لە کوێ دەکەونە خوارەوە

ئاڤا نیوز

 

گرژییەکانی نێوان ئیسرائیل و حوسییەکانی یەمەن تادێت زیاتر پەرەدەسێنێت، چاودێرێکی سیاسی یەمەنیش لەوبارەیەوە بە ئاڤای ڕاگەیاند، "ئەو گرژییانە بێ بنەمان و کاریگەرییان نییە، حووسییەکان خۆشیان نازانن مووشەکەکانیان لە کوێ دەکەونە خوارەوە".

 

وێنە گەورەکە: لەماوەی چەند هەفتەی ڕابردوودا حوسییەکانی یەمەن پێنج هێرشیان کردووەتە سەر ئیسڕائیل، دیارترینیان بەکارهێنانی مووشەکی بالیستیکی خێرا بوو، لەبەرامبەردا ئیسرائیل هەڵمەتێکی  چڕی هێرشی ئاسمانیی بۆ سەر چەند بنکەیەکی حوسییەکان لە حودەیدە و سنە دەستپێکردووە.

 

لێدوانی فەرمی: سەدام حەربی، لێکۆڵەری سیاسی لە شاری مەئرەبی یەمەنەوە میوانی هەواڵەکانی کاتژمێر 12 ـەی ئاڤا میدیا بوو و گوتی: هەموو ئەو هێرشە ئاسمانیانەی ئیسرائیل و حوسییەکان بەرامبەر یەکتر دەیکەن، هیچ کاریگەرییەکیان نییە.

 

زانیاریی زیاتر: حەربی ڕوونیکردەوە، ئیسرائیل تەنیا ژێرخانی یەمەن دەکاتە ئامانج، وەک فڕۆکەخانە و پرد و ڕێگاوبان، تائێستاش هێرشی نەکردووەتە سەر هیچ بنکەیەکی سەربازیی حووسیەکان، حووسیەکانیش تەنیا موشەک دەهاوێژن و خۆشیان نازانن لەکوێ دەکەوێتە خووارە.