ئاڤا زانیاریی لەسەر پێدانی زەوی بە یەکەی 80 و  70 بڵاودەکاتەوە

ئاڤا نیوز

 

ئەو توێژانەی کە بەپێی ڕێنماییەکان پرۆسەی دابەشکردنی زەوی نایانگرێتەوە، داوا دەکەن زەوییان پێ بدرێت، بۆ ئەم مەبەستەش ئامادەسازی تەواویان کردووە بۆ ئەوەی لەهەر دەرفەتێکدا سوودمەند بن و زەوی وەربگرن، وەزارەتی شارەوانیش کار لەسەر ئەوە دەکات هیچ توێژێک بێبەش نەبێت.

 

وێنە گەورەکە: چەند مانگێکە بەبڕیاری سەرۆکوەزیران مەسرور بارزانی پرۆسەی دابەشکردنی زەوی بەسەر فەرمانبەران و خانەنشینان و ئەوانەی کە پێشووتر سوودمەند نەبوونە، دەستیپێکردووە و تاوەکو ئێستا هەزاران پارچە زەوی لە سەرجەم پارێزگاکانی هەرێمی کوردستان دابەشکراون و وەجبەیەک ناوی دیکەیش ئامادەن بۆ ئەوەی بیدەن بەو کەسانەی ڕێنماییەکان دەیانگرێتەوە.

 

ئەوەی پێویستە بیزانیت: بەگوێرەی ڕێنماییەکانی وەزارەتی شارەوانی تایبەت بە دابەشکردنی زەوی، ئەو پرۆسەیە تەنیا فەرمانبەر و خانەنشینانی سەر بە وەزارەتەکانی هەرێمی کوردستان دەگرێتەوە، هەندێک توێژ هەن ئەو پرۆسەیە نایانگرێتەوە، بەڵام ئامادەسازی خۆیان کردووە بۆ ئەوەی ئەگەر لەهەر دەرفەتێک  لەبارەی ئەوانیشەوە بڕیار درا، فایلەکانیان ئامادە بێت و ئەوانیش لێی سوودمەند بن.

 

زانیاریی زیاتر: یەکێک لەو توێژانەی کە پرۆسەی دابەشکردنی زەویی نایانگرێتەوە، پێشمەرگەکانی یەکەی 80 و  70 ـن بەوانەی خانەنشینیش بوون،

 

زانیاریی تایبەت: سەرچاوەیەکی باڵا لە یەکەی 70 بە ئاڤای گوتبوو، فۆرمەکانمان ئامادەن و هەر کاتێک وەزارەتی شارەوانی داوا بکات ڕادەستیان دەکەین.

 

ئەمەش بزانە: پێشمەرگەکانی یەکەی 70 ئێستا فۆرمییان پڕکردووەتەوە، بۆ ئەوەی ئەگەر هەر کاتێک بڕیار بۆ ئەوانیش درا، بێبەش نەبن و زەوی وەربگرن.

 

لێدوانی فەرمی: سەربەست مەولوود، بەرپرسی بەشی یاسایی لە وەزارەتی شارەوانی و گەشتوگوزار بە ئاڤا میدیای ڕاگەیاند، "ئەم بابەتە پێویستی بە لێکتێگەیشتنی نێوان وەزارەتی پێشمەرگە و وەزارەتی شارەوانی هەیە، چونکە بە گوێرەی ڕێنمایی پرۆسەکە نایانگرێتەوە."

 

باکگراوند: چەند ڕۆژێک لەمەوبەر ساسان عەونی، وەزیری شارەوانی و گەشتوگوزار بە ئاڤامیدیای گوتبوو، "کێشەی لیستی ناوەکان چارەسەرکراوە و لەم هەفتەیە واژۆ لەسەر لیستی 100 هەزار کەس بۆ وەرگرتنی زەوی دەکەین و ئاراستەی ئەنجوومەنی وەزیران دەکرێت بۆ پەسەند کردنی."