پێشمەرگە قەرەچووغ و كەندێناوە كێوماڵ دەکات

ئاڤا نیوز

 

بەمەبەستی دڵنیابوونەوە لە نەهێشتنی مۆڵگە و حەشارگەی تیرۆرستانی داعش لە چیای قەرەچووغ و دەشتی كەندێناوە، هێزەكانی پێشمەرگە ناوچەکەیان کێوماڵ دەکات.

 

وێنە گەورەكە: بەهۆی دروستبوونی بۆشایی ئەمنی لە ناوچە كوردستانییەكانی دەرەوەی ئیدارەی هەرێمی كوردستان، شانە نووستووەكانی داعش جموجۆڵی چەكدارییان هەیە و ترس و دڵەڕاوكێ لەلای دانیشتووانی ئەو ناوچانە دروست بووە، پێشمەرگە لەلایەك و هێزە عێراقییەكان جارجارە ئۆپەراسیۆنی سەربازی بۆ گەڕان بەدوای پاشماوەكانی داعش ئەنجام دەدەن.

 

ڕاگەیێنراوی فەرمی: وەزارەتی پێشمەرگە ڕاگەیێنراوێكی بڵاوكردۆتەوە و تێیدا هاتووە؛ ئەمڕۆ یەكشەممە 05-01-2024، لیوای 18ـی پیادە ئۆپەراسیۆنێكی كێوماڵكردنییان لە سنووری چیای قەرەچووغ و دەشتاییەکانی کەندێناوە بۆ نەهێشتنی مۆڵگە و جموجۆڵی تیرۆرستان، ئەنجامداوە.

وەزارەتی پێشمەرگە ڕوونیشی كردەوە، گومان دەکرا چەکدارانی داعش جموجۆڵیان لەو ناوچانە هەبێت، بۆیە هەڵمەتی گەڕان و پشکنینیان ئەنجامداوە.