ئاڤا هۆکاری دابەشنەکردنی زەویی فەرمانبەرانی وەزارەتی کارەبا ئاشکرا دەکات

ئاڤا نیوز

 

هەزار و 438 فەرمانبەری وەزارەتی کارەبا لە سنووری هەولێر نزیکەی چوار مانگە ڕەزامەندی پێدانی زەوییان بۆ دەرچووە، بەڵام تاوەکو ئێستا تیروپشکیان بۆ نەکراوە و داوایان لە ئاڤا کردووە بەدواداچوون بۆ هۆکارەکەی بکەن. شارەوانی هەولێریش دەڵیت، بەمزوانە تیروپشکیان بۆ دەکرێت.

 

چیرۆکی سەرەکی: داواکاری ئەو فەرمانبەرانە بەمشێوەیە "ئێمە فەرمانبەرانی وەزارەتی کارەباین  ناوەکانمان لە زنجیرەی ژمارە 3562 دەست پێدەکات  تاوەکو ژمارە 5000 کەبە ناوی دیلان دلێر  کۆتایی پێدێت، لە ڕەزامەندییەکەی ئەنجوومەنی وەزیران تەنیا زەوی بۆ فەرمانبەرانی وەزارەتی کارەبا نەدراوە  وەزارەتەکانی دیکە ژمارەی زەوییەکانیان وەرگرت."

 

وێنە گەورەکە: بەرواری 13-10-2024 وەزارەتی شارەوانی و گەشتوگوزار ناوی پێنج هەزار کەسی هاوپێچی نووسراوێک کردووە و ئاراستەی سەرۆکایەتی ئەنجوومەنی وەزیران کراوە بۆ دابەشکردنی زەوی بەسەریاندا. لەو پێنج هەزارە سێ هەزار پارچەیان دابەشکراون، بەڵام بەشێکیان ماون کە تاوەکو ئێستا تیروپشکییان بۆ نەکراوە.

 

لێدوانی فەرمی: کارزان عەبدولهادی، سەرۆکی شارەوانی هەولێر بە ئاڤای ڕاگەیاند، "ئێستا لە پرۆسەی وردبینی و تەواوکردنی پرۆسەکەن، لەگەڵ ئەوەش زەوی ئامادەکراوە و بۆیان جیا دەکەینەوە، مافی هیچ کامێکیان نافەوتێت و لە ئایندەیەکی نزیک تیروپشک بۆ پێدانی زەوییەکانیان دەکرێت."

 

باکگراوند: لە سنووری سەرۆكایەتی شارەوانیی هەولێر، 50 بۆ 60 هەزار فەرمانبەر لەو بڕیارەی وەرگرتنی زەوی سوودمەند دەبن و لە گەزنە زەویان بۆ دابینكراوە.