تەندروستی سلێمانی ڕوونکردنەوە لەبارەی گیانلەدەستدانی ژنێک دوای نەشتەرگەری دەدات

ئاڤا نیوز 

 

بەڕێوەبەرایەتی گشتیی تەندروستی سلێمانی لەبارەی ڕووداوی گیانلەدەستدانی ئەو ژنەی دوای نەشتەرگەری دەرهێنانی چەوری، دەڵێت، 'لە پشکنینەکانی دا نەخۆشەکە هیچ کێشەیەکی تەندروستی نەبووە'.

 

چیرۆکی سەرەکی: شەوی ڕابردوو ژنێک لە نەخۆشخانەیەکی تایبەت دوای ئەوەی نەشتەرگەری دەرهێنانی چەوری بۆ کرا، 15 خولەک دوای نەشتەرگەریەکە دۆخی تێکدەچێت و گیان لەدەست دەدات.

 

لێدوانی فەرمی: د.هێرش سەلیم، جێگری بەڕێوەبەری تەندروستی سلێمانی، بە ئاڤا میدیای ڕاگەیاند: لە کاتی نەشتەرگەریەکەدا نەخۆشەکە هیچ کێشەی نەبووە، لە کاتژمێر 08:05ی شەو لە هۆڵی نەشتەرگەری هێنراوەتە دەرەوە، چارەگێک دواتر توشی هەناسە تەنگی بووە، بۆیە دکتۆرەکە و ستافەکە هەوڵەکانیان بۆ چارەسەرکردنی خستووتە گەڕ، بەڵام لە کاتژمێر 01:00 گیانی لەدەست دا.

 

جێگری بەڕێوەبەری تەندروستی سلێمانی گوتیشی: ئەمە دەبێتە دۆسێیەکی یاسایی، ئێمە لیژنە بۆ ئەو بابەتە پێکناهێنین، چونکە نەخۆشخانەکە تایبەتە و پەیوەندی بە سەندیکای پزیشکانەوە هەیە، بەڵام ئەگەر داوای نوێنەر لە ئێمە بکەن ئەوا نوێنەری یاسایمان بەشدار دەبێت.