سوودانی: عێراق ڕێگە بە دەستوەردانی دەرەکی لەکاروباری ناوخۆییدا نادات

ئاڤا نیوز

 

سەرۆکوەزیرانی عێراق دەڵێت، عێراق ڕێگە بە دەستوەردانی دەرەکی نادات لە کاروباری ناوخۆیی وڵاتەکەیدا، جەختیش دەکاتەوە کە بەغدا لە یەککاتدا پەیوەندییەکی باشی لەگەڵ واشنتن و تارانیش هەیە.

 

ئەوەی پێویستە بیزانیت: دوێنێ هەردوو سەرۆکوەزیرانی عێراق و بەریتانیا لە لەندەن کۆبوونەوە و واژۆیان لەسەر 13 گرێبەستی بازرگانی کرد بە بەهای نزیکەی 15 ملیار دۆلار، بڕیاریشیان دا بەغدا و لەندەن لەبوارەکانی کۆچبەران، ژینگە، ئابووری، بەهێزکردنی ڕۆڵی ژنان و دەیان بواری دیکە هاوکاری یەکتر بکەن.

 

لێدوانی فەرمی: محەممەد شیاع سوودانی، سەرۆکوەزیرانی عێراق لە چاوپێککەوتنێکدا لەگەڵ کەناڵی بی بی سی بەریتانی  ئاماژەی بەوەش کردووە، لە ماوەی ڕابردوودا عێراق سیاسەتێکی سەربەخۆ و هاوسەنگی لەسەر بنەمای بەرژەوەندییە باڵاکانی وڵات پەیڕەو کردووە، بۆ دۆخی ناوچەکەش بە پێویستی دەزانن پەنا بۆ دیالۆگ و چارەسەری ئاشتیانە ببرێت.

 

بەشێک لە قسەکانی سوودانی بۆ کەناڵی بی بی سی:

 

 - ئێمە ڕێز لە خواستی گەلی سووریا دەگرین بۆ دیاریکردنی چارەنووسی خۆیان، هەروەها دەبێت ڕێز لە مافی هەموو سوورییەکان بگیرێت.

 

-   شاندێکمان نارد بۆ سووریا چونکە دۆسیەی ئەمنی زۆر گرنگە، بەهۆی بوونی مەترسییەکانی داعش لەو ناوچانەی کە لەژێر کۆنتڕۆڵی ئیدارەی نوێی سووریادا نین.

 

-   بوونی سەربازی زیاتر لە وڵاتێک لە سووریا هەیە و ئێمە دژی هەر دەستوەردانێکی دەرەکین لە کاروباری ناوخۆیی هەر وڵاتێکی عەرەبی.

 

-   پەیوەندییەکی باشمان لەگەڵ وڵاتانی ناوچەکە و لەسەر ئاستی نێودەوڵەتیش هەیە، ئێران وڵاتێکی دراوسێیە و هاوبەشی و هاوکاری زۆرمان لەگەڵیدا هەیە، هەروەها لەگەڵ سعودیە و ئوردن و میسر هەماهەنگیمان هەیە.

 

-  عێراق پەیوەندییەکی باشی لەگەڵ ئەمریکا و ئێران هەیە، ئەمەش سوودێکە بۆ عێراق،  ئێمە بەشدار دەبین لە نزیککردنەوەی تێڕوانینی وڵاتانی ناوچەکە.

 

-  پەیوەندیمان لەگەڵ ئەمریکا دامەزراوەیی و ستراتیژییە، ڕێککەوتنی چوارچێوەی ستراتیژی کۆماندەکاتەوە.

 

-  عێراق سەربەخۆیە لە بڕیارەکانی، هیچ کاریگەرییەک نییە لەسەر بڕیارەکانمان، عێراق ڕێگەش نادات دەستوەردان لە کاروباری ناوخۆییدا بکرێت.

 

-   ماوەی دوو ساڵە، حکومەتەکەمان کار بۆ بوونیادنانی دامەزراوەکانی دەوڵەت و دامەزراندنی پەیوەندییەکانی دەرەوە دەکات، لەسەر بنەمای ڕێزی هاوبەش و دەستوەرنەدان لە کاروباری ناوخۆ.

 

-  پڕۆژەی ڕێگای گەشەپێدان بۆ سەرجەم وڵاتانی ناوچەکە پێشنیازکراوە، کاریگەری لەسەر وڵاتانی دیکە نابێت و باوەڕمان بە هاوبەشی ئابووری هەیە.

 

-  حکومەتەکەمان سەرکەوتوو بووە لە بەرزکردنەوەی ڕێژەی وەبەرهێنانی ئەو غازەی لە کاتی بەرهەمهێنانی نەوت (غازی هاوەڵ) دەسووتێت و 67‎% ی ئەو غازە بۆ وزە دەگۆڕدرێت و بەفیڕۆناچێت، بەرنامەشمان هەیە لە ساڵی 2028 ڕێژەکە بکەینە 0%، ئەویش دوای تەواوکردنی پڕۆژەکانی پەیوەست بەم بابەتە.

 

-  هەر لەیەکەم ڕۆژی پێکهێنانی حکومەتەوە ئامانجمان گەڕاندنەوەی متمانەی هاووڵاتییان بووە بەدامودەزگاکانی دەوڵەت، پابەندین بەجێبەجێکردنی بەرنامەی حکومەت لەهەموو بڕگەکانیدا.