مەسعوود پزشکیان: هەرگیز بیرمان لە کوشتنی ترەمپ نەکردووەتەوە

ئاڤا نیوز

 

سەرۆککۆماری ئێران ئەو تۆمەتانە ڕەت دەکاتەوە کە باس لە هەوڵی کوشتنی ترەمپ دەکات لەلایەن وڵاتەکەیەوە و دەڵێت، ئەم جۆرە تۆمەتانە دوورن لە ڕاستییەوە و هەرگیز بیرمان لە کردەوەیەکی لەمشێوەیە نەکردووەتەوە. 

 

وێنە گەورەکە: کێشە و ناکۆکییەکانی نێوان ئێران و ئەمریکا ڕەگ و ڕیشەیەکی مێژوویی هەیە، هەردوولا بەردەوام یەکتر تۆمەتبار دەکەن بە تێکدانی ئاسایش و ئارامی جیهان و ناوچەکە و دەستوەردان لە کاروباری ناوخۆی وڵاتانی دیکەوە.

 

لێدوانی فەرمی: مەسعوود پزشکیان، سەرۆککۆماری ئێران لە چاوپێکەوتنێکی لەگەڵ کەناڵی ئێن بی سی ئەمریکی چەند بابەتێکی باس کرد لەنێویاندا پەیوەندییەکانی نێوان ئێران و ئیدارەی نوێی ئەمریکا تەوەری سەرەکیی چاوپێکەوتنەکە بوو و پزیشکیان ئاماژەی بەمانە دا: 

 

- ئێران ئامادەی گفتوگۆیە لەگەڵ ئیدارەی نوێی دۆناڵد ترەمپ.

- ئەمریکا بە بەڵێنەکانی خۆی پابەند نەبووە و هەمیشە هەوڵی لەناوبردنی ئێرانی داوە.

- ئێمە بەدوای شەڕدا ناگەڕێین، بەڵکو تەنیا لە ئەنجامی هەر کارێکی بەرامبەرمان کاردانەوەمان دەبێت. 

- ئێمە لە شەڕ ناترسین لەگەڵ ئەوەشدا خوازیاری شەر نین و هیوادارم هیچ کات نەگەینە ئاستی شەڕ لەگەڵ هیچ لایەنێک، چونکە بۆ هەردوولا تەنیا وێرانکای لێدەکەوێتەوە.

 

ئەوەی پێویستە بیزانیت: ئەم لێدوانانەی مەسعوود پزشکیان لەبارەی ئەمریکا لەکاتێکدایە کە ئێران دەبێت خۆی ئامادە بکات بۆ ڕووبەڕووبونەوە لەگەڵ دەسەڵاتی ترەمپ کە چاوەڕوان دەکرێت سزای قورس بەسەر ئێراندا بسەپێنێت.