ئاڤا لە زانکۆی ئیدلیب؛ شوێنی پێگەیاندنی سەرۆکوەزیران و بەشێکی سەرکردەکانی ئێستای سووریا

ئاڤا نیوز

 

تیمێکی ئاڤا کە ئێستا لە سووریایە دەچێتە نێو بەناوبانگترین زانکۆی ئەو وڵاتە، کە زۆرێک لە سەرکردەکانی ئۆپۆزیسیۆنی ئەوسا و حکومەتی ئێستا تێیدا خوێندوویانە.

 

وێنە گەورەکە: زانکۆی ئیدلب بەم ناوەی ئێستا لەدوای ساڵی 2015 دامەزرا، ئەوکاتەی ئۆپۆزیسیۆنی سووریا شاری ئیدلبی کۆنتڕۆڵ کرد، پێشتر کۆلێژێکی سەر بە زانکۆی حەلەب بوو. لەدوای دامەزراندنیشییەوە فەرماندە سەربازییەکان و سەرکردەکانی ئەوکاتەی ئۆپۆزیسیۆن لەم زانکۆیە دەستیان بە خوێندن کرد و ئێستا لەپاڵ سەرۆکوەزیران، پێنج وەزیری دیکەی حکومەتی نوێی سووریا دەرچووی ئەو زانکۆیەن.

 

لێدوانە فەرمییەکان:

د. عەبدولحەميد عەبدولخالق،  سەرۆکی زانکۆی ئیدلب قسەی بۆ ئاڤا کردووە و دەڵێت: نزیکەی 25 هەزار قوتابی لەم زانکۆیە تۆمارکراون لە هەموو کۆلێژ و بەشەکان،  سەرەڕای توانای سنووردار و بۆردوومان و جەنگ، لە ماوەی ڕابردوودا پرۆسەی خوێندن تێیدا بەردەوام بووە، حکومەتی ئیدلب سوودی زۆری لە دەرچووانی زانکۆکە وەرگرتووە، بەشێوەیەک بەشی هەرە زۆری کادرە زانستی و کارگێڕییەکانی دەرچووی زانکۆی ئیدلبن.

 

محەممەد موعتەسم، قوتابی زانکۆی ئیدلب بۆ ئاڤا دەڵێت: پێشتر بارودۆخ زۆر خراپ بوو، شەڕ و تۆپباران هەبوو، بەڵام دەوام و خوێندن نەوەستا، لە سەردەمی ڕژێمی پێشوو دەرفەت و هەلی کار کەم بوون، بەڵام دوای ئازادکردنی سووریا دەرفەتەکان زیاتر بوون.

 

زانیاریی زیاتر: تیمی ئاڤا میدیا بەنێو زانکۆکەدا گەڕاوە و سەردانی بەشەکانیشی کردووە، بەپێی ئەوەی بینراوە هەرچەندە ئیدلب لەژێر بۆردوومان و جەنگێکی سەختدا تێپەڕیوە، بەڵام هەموو پێداویستییەکانی قوتابییان لە سەرجەم بەشەکان دابینکراون.

 

ئەمەش بزانە: زانکۆکە لە 28 کۆلێژ و حەوت پەیمانگە پێکدێت، کچ و کوڕ بە جیا و لە شوێنی تایبەتی خۆیان دەخوێنن، واتە سیستەمی تێکەڵاویی کوڕ و کچ لە زانکۆکە پەیڕەو ناکرێت.

 

ئەوەی پێویستە بیزانیت: زانکۆی ئیدلیب لەسەرەتای دامەزراندنییەوە تاوەکو ئێستا زیاتر لە 25 هەزار دەرچووی هەبووە، لە چوار ساڵی ڕابردووشدا توانای کۆلێژەکانی بەرزترکردوونەتەوە و ساڵانە نزیکەی سێ هەزار و 500 دەرچووی لە هەر 28 کۆلێژەکەیدا هەبووە، لە ئاستی ماستەر و دکتۆراشدا تاوەکو ئێستا 150 کەس بڕوانامەی دکتۆرا و  450 قوتابیش ماستەریان بەدەستهێناوە کە سەرۆکوەزیرانی ئێستای سووریا یەکێکە لەوان.