ڕێککەوتنی ئاگربەستی غەززە دەچێتە بواری جێبەجێکردنەوە

ئاڤا نیوز

 

ئەمڕۆ یەکشەممە دوای تێپەڕبوونی چوار ڕۆژ بەسەر ڕاگەیاندنی ڕێککەوتنی ئاگربەستی غەززە، بڕیارە کەمتر لە کاتژمێرێکی دیکە ڕێککەوتنەکە بچێتە بواری جێبەجێکردنەوە. 

 

چیڕۆکی سەرەکی: کاتژمێر 09:30ـی بەیانی ئەمڕۆ بە کاتی هەولێر، ئاگربەستی نێوان ئیسرائیل و حەماس دەچێتە بواری جێبەجێکردنەوە و لە چوارچێوەی قۆناغی یەکەمی ئاگربەستەکەشدا، بڕیارە لە کاتژمێر 05:00ـی ئێوارەی هەمان ڕۆژ ئاڵوگۆڕی دیلەکان لە نێوان ئیسرائیل و حەماسدا بکرێت، کە 33 بارمتەی ئیسرائیل لەلایەن حەماسەوە ئازاد دەکرێن، لەبەرامبەریشدا ئیسرائیل 1890 دیلی فەلەستینی ئازاد دەکات.

 

چی ڕوودەدات: کەمتر لە کاتژمێرێکی ماوە ڕێککەوتنەکە بچێتەبواری جێبەجێکردنەوە بەڵام ئیسرائیل ئێستا بۆردومانی شاری ڕەفەح لە باشووری کەرتی غەززە دەکات. 

 
لەلایەکی دیکەوە: بنیامین نەتانیاهۆ، سەرۆکوەزیرانی ئیسرائیل هۆشداریی بە حەماس دەدات و دەڵێت،  ئیسرائیل مافی دووبارە دەستپێکردنەوەی شەڕی هەیە بەشێوازێکی نوێی و تووند ئەگەر ڕێککەوتنەکە بەشێوەی پلان بۆ داڕێژراو پەیڕەو نەکرێت و نەچێتە بواری جێبەجێکردنەوە. 

 

باکگراوند: ڕۆژی 15-1-2025 و دوای 15 مانگ لە شەڕ و بۆردومان لە کەرتی غەززە و کوشتنی سەدان هاووڵاتی سڤیل دواجار ڕێککەوتنی ئاگربەست و ئاڵوگۆڕکردنی دیلەکانی نێوان ئیسرائیل و حەماس بە نێوەندگیریی ئەمریکا و قەتەر و میسر هاتە ئاراوە.